笑到最後：有閒錢應買倫敦樓
■截至4月，倫敦平均樓價41萬英鎊。 資料圖片
首先，本地華文財經傳媒話英國公投脫歐係「黑天鵝」，係錯嘅！「黑天鵝」典故，出自18世紀啲歐洲人以為天鵝只有白色，後尾去到澳洲先知有黑天鵝，用嚟隱喻事件好罕見。而公投只有兩個選擇：留歐定脫歐，兩個選擇都寫曬喺選
票上，請問何來黑天鵝？
兜個圈講黑天鵝，其實係想帶出，脫歐並唔係乜嘢天跌落嚟嘅事，至少股市喺呢一刻，已高過脫歐公投前水平。脫歐亦唔係史無前例，格陵蘭都試過脫歐。
世界冇話冇咗邊個唔得，歐盟可能會咁同英國講，但倒返轉，英國冇咗歐盟亦非世界末日。本來歐盟就係「中央」，要不是中央「默大大」放啲難民「自由行」去倫敦，英國就「完蛋了」。但脫歐後，英國唔使聽中央話，即使「默大大」唔放自由行，英國人都可「民族自決」，唔使再等中央打救，食四方飯。好似瑞士從未加入過歐盟，得享獨立優勢。
比瑞士更優勝係語言，國際語言地位嘅優勢，去一次非英語國家就明，唔識當地語言，你會假設對方識英文，定係德法中文？全世界絕多數旅遊區，人哋都假設你識英文。如果喺歐洲更明顯，英國啲生番只識英文，但其他歐洲城市人除自己語言，多數都識少量英文。
未講普通法制、合約精神，淨係第一句開口嘅語言，英國已佔盡優勢，未來十年都好難有變。再講，香港同中國高官會否因為脫歐而唔送仔女去英國讀書？唔會。根據英國土地註冊處，截至4月，倫敦平均樓價41萬英鎊，脫歐前英鎊兌港元11.5，最新10.05，未計樓價下跌，乜都冇做，已慳60萬港幣。
有閒錢應買倫敦樓，因英國投資市場，係較早期發展嘅市場，經歷過唔同風浪。今日脫歐令市場情緒避險，過多十年八載，一個資產泡沫就挾番上去。只要你語言不通時，第一時間諗起要講英文，英國嘅投資市場都唔會死，而買首都樓就係最簡單投資當地嘅方法。
高明
http://fb.com/bigricetea
本欄逢周一刊出
高明
笑到最後 - 高明 舊文
來源 source: http://hk.apple.nextmedia.com
