異動空間：疊水仲要批股？
■美國9月加息其實是好事，可消除不明朗因素，之後幾個月仲好炒。 資料圖片
耶倫在Jackson Hole講加息繼續一貫作風，「有條件加，就快加，應該加、除非唔加」，一如麥格理分析師Wizman所言「乜都無講過」。何解玩咁多語言藝術，加到點解唔加？兩個可能性：
一、銀紙浸市的經濟係吊命，唔係固本培元或浴火重生，多加幾次息係會瓜柴，每年輕輕加一次，再買時間等經濟慢慢好係較理想做法。二、政治因素。大選前加息唔係唔得，但如希拉莉馬失前蹄落敗，呢筆賬好可能會算落或賴落倫姨頭上，佢都係打工仔一名，呢個鑊實在無謂孭，待大選塵埃落定12月再加，順理成章。
倫姨講完，市場都估最快12月先加，美元急跌金價抽上，但隨後副主席費希爾又補多句，話耶倫個取態係最快9月都加得，個市即時又調轉行，真係玩死！上周魏力都寫過，9月加息其實係好事，消除不明朗因素，雖然加息前後可能會跌一浸，但今年再無後顧之憂，之後幾個月仲好炒，唔怕佢加，最驚佢唔敢加。
講番股票，中國飛機租賃（1848）半年純利升106%，派息多2.5倍，手頭現金48億銀，但業績後仍折讓一成批股，原因顯然非為撲水，批股為炒的可能性更高，要吼實。
魏力
http://www.fb.com/2012jason
本欄逢周一、五刊出
魏力
異動空間 - 魏力 舊文
來源 source: http://hk.apple.nextmedia.com
