笑到最後：突破港人港地盲腸
■遊偉光一早就講過，港人港地冇話包括畀香港人以合理價錢買到樓。 資料圖片
上星期被「語言偽術」籠罩嘅香港，出現一股罕見嘅清泉，就係中海外（688）地產董事總經理遊偉光被記者問點解「港人港地」樓盤啟德1號市價開售，遊偉光就話：「特首無講話以合理價錢畀香港人買
到，只不過係畀香港人優先買物業。」
嗰日咁啱撞到孫柏文，佢話：「好耐冇見過咁refreshing嘅人，仲要係國企，不嬲都係有咁含蓄答得咁含蓄，佢嘅台詞應該係『雖然貴啲但質料靚』嗰隻嘛。」高明話，「唔好話國企，有時長實（1113）同新地（016）賣樓，記者去聽都驚拎唔到嘢番嚟，因為發言人一定唱好樓價」。
中國海外2007年一期自己推出嘅刊物專訪遊偉光，話佢1986年喺理工學院（現為理工大學）畢業，修讀建築工藝及管理。1990年見到報紙登中國海外地產招聘營業部物業主任嘅廣告，就去應徵，過兩個星期就請咗佢，2005年仲升至中海外地產董事總經理，一路做到𠵱家。
其實2013年遊接受本地傳媒訪問，已經講明「港人港地」唔會平價賣樓，因為深圳地價貴過香港。只係，當時輿論比較關心中資奪港人港樓地，遊偉光嘅訪問未有太多人留意到。
啟德1號扣除折扣優惠後，實用呎價由12,741元至15,562元，平均呎價約14,468元。啟德機場附近土瓜灣同黃埔等地嘅屋苑，平均實用面積呎價都係萬三以上，九龍灣德福都要過萬。港人港地冇平過，但係未來30年賣出去都只可以賣畀香港人，正常經濟分析都要有折讓，但市場搶樓情緒可能短線無所謂。
今次發展商仲要講明特首冇話係港人合理價，將樓價責任還返畀梁振英。肯畀錢買落去嘅，都要對梁振英施政有特別大信心。
高明
http://www.fb.com/bigricetea
本欄逢周一刊出
高明
笑到最後 - 高明 舊文
來源 source: http://hk.apple.nextmedia.com
