【實力取勝】炒股第一誡：記住睇市值呀！（陳承龍）（第84期）
2016-8-7 18:00:48
沒有看開策略王的朋友，都以為策略王只係教大家炒細價股，這就大錯特錯，近半年有看開我們的朋友都知道，我們介紹了不少指數成分股，例如大如騰訊（700）、銀娛（027）等。事實上，叫大家入
嗰啲價都幾靚，尤其隻騰訊（700），由160多元係咁叫，到現在180多元，都算有交代。簡單一點講，策略王不是亂畀冧把，但又好簡單，我們往住只是順住個勢分析，呢期係啲資金是專攻大價股嘅，我哋就幫大家揾圖及分析，最緊要啱用，但全部是有原因。
其實，講值博率，始終也是細價股最抵博，但炒細價股第一樣嘢要睇嘅一定係睇市值。策略王創立至今，所介紹的細價股絕大部分是細市值，10億元以下，幾億元之上，雖然未必隻隻可以有得贏，但如做足止蝕位，蝕極有限。反之，如果買到啲好似德普（3823）同恒發（911）呢類一度過百億元市值的股份，其實真係唔多安心。老實講，策略王一次都未介紹過，因為個市值真係唔合理。
你自己諗嚇啦！究竟賣乜嘢人蔘可以賣到過百億市值先?又或者咁講，賣乜嘢慳電膽，可以有200億市值先?嗰隻慳電膽其實仲要好低技術，就算冇沽空機構出報告，都唔掂得。不過，大家有冇發現，兩隻股都有一個共通點，當個市值落到10億元附近，就有好強承接，甚至乎見底，呢個咪就係個底價囉。最有印象隻恒發，當日被斬倉，個股價最低被劈至5億元，剛好殼價水平，就再落唔到。至於隻德普，就好啲，落到0.12元，約十多億市值就停手。
如果大家跟足呢個我哋一直強調嘅睇市值炒股價法，其實真係已經好掂，呢個係炒股票第一誡，尤其真正嘅股仔，你要當佢所有業務都冇，淨係睇殼價先，跟住先慢慢從業務上，計返佢殼價之上應有嘅溢價。不過，我都係鍾意啲市值連殼價都未到嘅股份，呢啲一定係超超值，好似隻家夢（8101），市值仲平過殼價，有冇搞錯?
偉祿夠實力 回吐唔怕撈
另外，上周細價股攬炒急跌事件中，我隻愛股偉祿（1196）都被拖累急跌，最低曾跌穿3元關口，不過，有實力嘅股份，點都有抗跌力，轉個頭就上返4元樓上。其實呢隻都幾無辜，本身個老闆有水，之前不斷增持公司股份，而市值超級偏低，單是手上的深圳地皮豈止幾十億元，難得偉祿股價又回到我之前介紹的水平，真係唔怕加注。
實力取勝 - 陳承龍 舊文
來源 source: http://www.winmoney.hk
