笑到最後：
大市進入另一階段
■近期港股變化好明顯，短炒冇乜運行，長揸反而佔優。 資料圖片
一個唔太科學嘅測市方法，就係問身邊炒股嘅朋友戰績係點。多年問人心得，得知大部份人都係贏嘅時候大大聲，冇咁順手嘅時候匿埋。但今日重點唔係批判散戶嘅行為，而係撇除炒友「隱惡揚善」嘅習慣，近日高明有兩
個觀察：第一，短炒嘅唔係好掂，不論係大價定係細價股；第二，長揸，至少揸實隻股冇炒出炒入，係呢一轉升浪嘅主要收入來源。
量寬QE咁多年，其實只有長揸美股先至可以穩贏，港股唔係冇，實質上長揸得嘅，只係得一隻騰訊（700）。就連濠賭股咁勁，去到中途都不支倒地，長揸嘅結果冇高位放咁好。正因為有呢個「因」，一個炒股票嘅人理性嘅「果」係，長揸選擇去其他市場，例如美股；港股用嚟炒嚇波幅就算，A股股災後一段長時間仲係升幾個百份點就走唔切。
近期嘅港股變化好明顯，短炒倒轉冇乜運仔，長揸反而佔優。呢個現象，有兩個可能性：第一，好似之前所講，出現貨幣危機，有一部份人已經好努力咁不斷將手上現金減持，轉為持有各類資產；第二，香港市場終於大個仔，經歷咗咁多風風雨雨，今次終於變得比較有規模，脫離純炒波幅階段。
第二點，其實高明都唔係好信，因為中國經濟前景唔配合，現時可能中國仍然有好多土豪大把錢，以為沒有中國，世界就玩完。但股市係炒未來，中國每隔兩年就要啲文人諗點作個故仔去保八、保七、保六，相信中央有好多文膽已經諗緊到「保五」嘅時候作啲咩去粉飾太平。試問一個國家經濟增長年年下降，前景形勢點會一片大好？冇憧憬聽日好過今日，就唔係企業盈利支持股價增長。
所以返轉頭，今次升市係貨幣現象為主，脫歐後反彈嘅一啲貨，除非加息，否則某啲大戶係唔會放番出嚟，因為以大戶嘅身家，貨幣貶值對佢哋影響明顯，同鋪鋪清嘅我等受薪階級唔同。
高明
http://www.fb.com/bigricetea
本欄逢周一刊出
高明
笑到最後 - 高明 舊文
來源 source: http://hk.apple.nextmedia.com
