財金冒險號：
政治素人催黑天鵝
■點解選民明知遊蕙禎議政能力不及毓民，都照投票畀佢？無非係求變。 資料圖片
今年係政治素人冒起嘅一年。羅冠聰、遊蕙禎兩個後生仔女，雨傘革命後冒起，毫無從政經驗，一個高票當選，一個竟然砌低毓民。香港素人最多做個議員，得否決權，無份制定政策，歐美素人就犀
利，隨時做到總統、總理。
當今最矚目嘅素人，當然係美國總統候選人特朗普。意大利都有個素人Beppe Grillo，諧星一名，同特朗普一樣，原本只會出現喺電視節目而非議會，2009年至創立「五星運動」，立場反建制、反歐盟。
意大利即將於10月或11月舉行公投，表決修改憲法，總理Matteo Renzi押上自己仕途，表明若民眾否決修憲，自己就會落台，好似英國前首相卡梅倫咁玩完。到時如果意國總統宣佈提前選舉，近年民望大升的五星運動領袖Grillo就有機會成為新總理。既然五星運動係疑歐派，意國好可能學英國搞脫歐公投，咁歐盟就一波未平，一波又起，面臨解散危機。
假設Renzi真係落台，意大利人會否選個諧星上去？諗番香港，點解選民明知遊BB議政能力拍馬都追唔上毓民，都照投票畀佢？無非係求變。好地地嘅唔會想變，梗係逼到埋身至想博一鋪。
意大利經濟衰咗10年，喺歐洲大國之中最黴，銀行壞賬又隨時爆，最大鑊係失業率高企，人民就梗係求變，可能催生另一隻黑天鵝。
笑笑生
mailto:sneeringman@gmail.com
本欄逢周四刊出
笑笑生
財金冒險號 - 笑笑生 舊文
來源 source: http://hk.apple.nextmedia.com
