操盤手劄記：
廁紙好賺大行畀讚
■理文造紙股價現黃金交叉，料可再上。圖為集團首席執行官李文斌。 資料圖片
北水勢滔滔！港股通連續6個交易日，日日有近40億至50億元淨流入，舊年4月大時代以來最強。港股現時係資金市，後市難測，因為資金市對基本因素要求唔大，尤其今次由北水帶動，北水點炒
A股有辦你睇！外資大戶追捧新興市場，亦惠及港股。恒指連升4日後，昨日稍事回氣，微跌45點或0.2%，收23741。喺大媽、大戶簇擁下，中線料反覆偏好。
股王騰訊（700）前日再破頂，市值打入全球十大唔再講，就連中型股、小型股都被帶旺，紛紛破頂，同日就有過百隻股份創52周新高，當中有兩隻係紙業股——晨鳴紙業（1812）和理文造紙（2314），後者實創9年新高，昨更賈其餘勇，即市再破頂！
理文係內地包裝紙龍頭之一，上月派中期成績表，雖然收入按年減少3.8%至83.7億元，但純利按年增長27.7%至14.3億元創新高；兼且毛利率按年增加2.6個百分點至23.2%，交到差！拆開嚟睇，包裝紙、木漿收入減少，但衞生紙收入卻增加3.8倍！
集團2014年拓展衞生紙業務，舊年4條生產線全面投產，舊年第四季更推出自家品牌「亨奇」。新業務起步，已嘗到甜頭，勢成盈利增長引擎。相對行內龍頭如恒安（1044）、維達（3331），集團擁有成本優勢，皆因原料竹漿、發電、運輸，都係自給自足。
阿爺強調去產能、講環保標準，造紙業亦唔例外，出現汰弱留強。理文嘅包裝紙利潤由舊年年底每噸423元升到538元，衞生紙更好賺，每噸達654元。本周初，細摩再出報告讚理文嘅廁紙業務能為集團增值；又指集團係內地第二大牛卡紙生產商，預期行業下季供不應求，因而維持「增持」評級兼上調目標價。截至6月底，集團流動資產佔總資產26%，現金及銀行存款達14.2億元，加上附屬早前取得40億元銀團貸款，水頭充足。睇走勢圖，呈現杯柄形向上突破，昨收6.53元，10天線升穿20天線，出現黃金交叉，料回氣後有力再上。
割柑人
本欄逢周四刊出
割柑人
操盤手札記 - 割柑人 舊文
來源 source: http://hk.apple.nextmedia.com
