主要股東抽水潮現
2016年09月08日
港股四連升後出現回吐，早幾日領升嘅股份都有回吐，資金開始炒吓落後，內險股就借住A股好番啲推上。
A股昨日初段造好，但之後回軟，上證指數收報3091點，只係微漲1點；深證成指報10838點，跌22點。不過，借住上證指數一度重返3100關，內地
保險股乘機造好，其中國壽(2628) 收升4%，造20.15元，為升幅最大藍籌。太保(2601) 升2.95%，造29.7元；新華保險(1336) 漲2.33%，造32.95元；中國太平(966) 升1.84%，造16.62元。
如果睇A股升幅，內險股無理由升咁多，所以只能解釋係資金追落後。內地O依家金融市場仲係麻麻，內險股投資環境唔見得有好大改善，佢哋只係因為落後所以有人買吓，而唔係前景好推動。大市昨日整體氣氛偏軟，恒指收報23741點，下滑45點；國企指數收報9970點，上揚31點，成交金額796億元。
內險股環境無大改善
本港樓市出現怪現象，就係排緊隊賣嘅樓增加，但樓價無因為供應紓緩回落，個別新盤呢排仲吹吓加價，好似信置(083) 高層就話，旗下西貢逸瓏海匯，今日稍後推出2號價單，涉及30伙，較之前定價高約2至3%。新盤銷情比預期好，有大行仲轉軚，將今年樓價預測由跌轉為微升。
點樣解釋呢個現象呢？有中環茶友話，大地產商O依家手頭大把水，有條件市況唔好就放慢推盤，或者好似早前咁做超高按揭。用家忍唔住入市，佢哋又得米，可以企番硬。但更大理由係政府土地供應始終好緊張，O依家私樓多咗，但公屋又唔夠，加埋最近內房商來港搶地，形成地價無得跌嘅心理預期。
龍湖股東抽水19億元
講起土地供應唔夠，前特首曾蔭權接受訪問指當年政府暫停賣地，事後回想雖然停賣地，但亦要積極開發新地皮。佢話會接受各方批評，亦要考量客觀環境，直言最艱難工作是開發新地皮，當中涉及環保人士、地區人士及既有利益者；不論移山填海、發展綠化土地、加高加密發展都會惹來反對。煲呔曾單官司就快開審，佢都要出嚟做吓訪問洗吓底，退休特首搞到咁，你話做人幾難呢！
當年曾蔭權做特首，樓價升個不停，好多人鬧佢官商勾結，認為政府行高地價政策，點知佢落咗任後，樓價升得仲勁。雖然現屆政府積極搵地，甚至好多本來唔可以起樓嘅地都搶咗嚟起樓，興建中樓宇數量明顯增多，但係樓價除咗今年上半年跌過，基本上都係上升軌中。
有人話，今次立法會選舉嘅票王朱凱迪，打正招牌「土地正義聯盟」，最反對政府搵地起樓，佢入咗立法會，政府要搶地起樓可能難度再增。
個市升番咁上下，開始有啲抽水潮，龍湖地產(960) 股東Junson Development，正向市場配售1.5億股股份，每股配售價為12元，較今日收市價12.9元折讓7%，套現18億元，聯合帳簿管理人為高盛。呢啲活動反映有啲大戶覺得個市升得差唔多，我覺得這只是一個開始，到超級大戶出來抽水時，個市就好易抽到虧啦。
內地樓市今年持續升溫，龍湖地產今年都調高咗銷售目標，上半年佢業績持平，短期經營應該唔差，但由於樓價升得急，同買家承擔能力進一步拉遠，當局加強調控力度日益增加。龍湖股價近半年由10元樓下升上12.9元水平，累積升幅接近30%，現價市盈率7倍，息率約3.3%，大戶出貨唔會等最後一浪，就先趁有人要貨沽咗先。
另外有啲股仔呢排都有動作，好似供股供到股東驚嘅錦興(275) 宣佈會改名後，股價就開始陰陰升。
陸羽仁
金融High Tea 舊文
來源 source: http://hdfin.stheadline.com
