Money Walker：
超級星期三睇債息異動
■參考芝商所利率期貨，全年合共加息四次機會率暫時只得兩成。 資料圖片
講咗好耐嘅3月15日「超級星期三」終於殺到，不過筆者認為荷蘭大選、美日議息、美國債務上限到期都稱唔上係黑天鵝。因為事前無法預期兼且全無準備，但又突
然發生嘅事件先算係黑天鵝，但市場對上述幾單嘢點都已經有啲心理準備，故即使有震盪出現亦肯定未到黑天鵝級數。
上述所謂「黑天鵝」事件中，最值得關注仍然係美國議息。事關美國債務上限幾年來擾攘無數次，每次最後都有驚無險；而荷蘭大選結果則係今年其他歐洲國家大選風向標，但該場大選本身對環球影響其實唔大，對市場直接影響點都唔夠美國今年加息次數來得重要。
由於大家一早預咗今年加息只有兩次或三次，一旦今次議息後儲局預示要加四次先夠，市場震盪將在所難免。參考芝商所（CME Group）利率期貨，今年每季加息一次，亦即全年合共加息四次嘅機會率，暫時只得兩成左右。倘議息會議顯示儲局對加息睇法出乎預期地進取，逼使市場加息預期升溫，「加息係好事，反映經濟好轉」嘅論調就會突然反轉，變為「加息步伐過快或會引爆危機」。
每逢加息都要格外留意十年期美債息，今次要提防嘅關鍵位係2.64厘，債息最近4個月一直於2.29厘至2.64厘之間橫行，近日更喺區間頂部徘徊，倘債息突破該頂部，股市同滙市定必會有大變動。筆者就有少少擔心會再度觸發人仔跌浪，繼而累及港股大市。
El.
http://fb.com/moneywalkerhk
本欄逢周三刊出
El.
Money Walker - El. 舊文
來源 source: http://hk.apple.nextmedia.com
