細奀時代：股樓都有忠奸之分
無懼辣招，樓盤銷情依然暢旺，另一邊廂，股市卻困在窄幅上落，交投淡靜，兩個市場的氣氛，形成一個強烈對比。股市難升，因為大家怕加息、怕聯儲局收縮資產負債表、怕特朗普交唔到貨、怕歐盟解體、怕北韓局勢等等，但樓市同樣面對這些不明朗宏觀因素，而且物業市場流動性低，一
入市至少坐幾年，買家一樣可以豁出去無懼風雨。
歷史理由是香港樓市表現遠勝股市，尤其是近十年。當然股市有股王，樓市亦有劣質貨，但股市中獎及樓市中伏機會都比較細，所以在大眾心目中，樓市是忠股市是奸，有不少物業投資者索性一股都無，股票睇都唔睇。物業至少唔會呃人，股市中騙子卻多的是，中國股票泛濫，的確做衰了港股巿場的形象。
可是比較精明而又同時活躍於物業及股票的投資者，對待兩個市場的態度也有分別，因為買股票太過容易，隨時都得，有咁多不明朗因素，暫時唔會升，唔使心急買，不如等平五個巴仙，就算唔係，平兩個都好，又或者等到炒到有勢先至追。
相反買樓卻無得等，越等就越貴，根本不理大環境。二手業主惜貨如金，係香港沽樓，係破釜沉舟預咗買唔番，無人會平畀你，而發展商用了財力，用各式各樣計劃協助買家入市，自然可以善價而沽。
REITs有機會重估
從兩個市場的分差，可以得出兩個結論。第一是房地產信託基金（REITs)有機會重估，因為REITs唔會呃人，形象比股票好，相比單一物業，還有分散投資及省卻管理麻煩的優點，當走勢逐漸營造穩步上揚的期望，就會吸引投資者入場，收窄與物業之間估值的差距。所有資產，都是越升越多人買，有得平反而個個等。
第二是政府大部分辣招方向都是錯，壓抑需求的同時，亦令到二手業主唔夠膽沽樓，樓巿長期低成交乾升，營造了只升不跌的期望。可是將來一旦打破了良性循環，忽然之間大家覺得可以等，跌勢相信會相當猛烈，一旦有朝一日政府減辣，令樓市交易費用下降，二手供應增加，就要十分小心。
樓市可以貴過股市咁多，反映出中港金融市場發展有問題，上市公司質素太參差，投資者教育接近無，於是新手入場通常幾個回合內就跌入騙子陷阱，侷住有錢人買物業。情況太離譜，估值太懸殊，希望稍稍修正，但不要期望市民會大幅改變。
阿飛
本欄逢周二刊出
阿飛
細奀時代 - 阿飛 舊文
來源 source: http://hk.apple.nextmedia.com
