金手指 - 孫柏文 2017年4月18日
金手指：林鄭與貧富懸殊
■香港人說房屋為最大社會問題，其實真正矛盾在於貧富懸殊。 資料圖片
問啲填鴨式教育產物，香港最大社會問題係乜？佢哋話：「房屋！」前周末，孫柏文去咗阿爾巴尼亞參加咗「歐洲保守派和改革主義者聯盟」會議。咁我被安排喺會議最後一個研討會做講者，議題圍繞未來點樣推動自由。
我話：「計劃經濟核心，就係政府監粗喺某啲嘢上定價同量，仲要越遠離民粹、越被專家控制為上策。雖然最終完全冇效率兼多副作用。不過喺民主、已發展經濟體、保守派支持嘅管治概念中，就係有一環政策完全以計劃經濟進行，呢個就係中央銀行下嘅貨幣政策。專家話事，冇民意基礎，啲人係唔會造反，如果啲專家冇錯的話，不過咁多年嘅量化寬鬆印銀紙，已令世界貧富懸殊非常嚴重！」我講到呢到，有啲人皺起眉。我繼續話：「大家唔使擔心人民會向左走，因為左派冇答案。𠵱家啲人嬲嘅係資產懸殊。所以如果連我哋呢邊對貨幣政策都冇答案，啲人會放棄傳統左、右，擁抱新思維，例如英脫歐、特朗普等。」
香港人嘈關於房屋，其實唔係講緊冇地方住，而係講緊資產差距。當資產價格大升，好多人冇份參與時，咪話係「房屋」囉。唔信？你咪試嚇做好多助人置業嘅嘢，跟住樓價唔升，睇嚇你嘅支持度升定跌囉。
當然，官都係斷錯症，蠶食已冇認受性嘅管治權。上周推百萬富翁福利計畫，叫冇資產嘅打工仔畀錢啲大把資產但冇收入嘅老人，你覺得政府支持度會升定跌？視民意為浮雲多好，唔知林鄭月娥會否延續。
孫柏文
獨立股評人
http://www.fb.com/shuen
本欄逢周二刊出
孫柏文
金手指 - 孫柏文 舊文
來源 source: http://hk.apple.nextmedia.com
