中環在線 - 李華華 2017年4月18日
中環在線：賭王三太忍痛執古董店
■禦珍閣原位於中環荷李活道168號地下C舖，現已拆去招牌。
「賭王」何鴻燊嘅三太陳婉珍一向多物業投資，查實佢仲有經營古董店。三太喺中環荷李活道有間經營咗超過廿年嘅「禦珍閣」，不過呢間古董店今年初已經低調結業，三太正將舖位放租，而且係交由乖女何超雲處理租務事宜。
問三太點解唔再經營古董店，佢即時大呻話「係好可惜，好唔捨得」，佢強調，並非因為生意或者市道差而執咗佢，主要因為佢冇咁多時間打理，仔女又冇興趣接手經營，佢惟有忍痛執咗佢喇。
三太其實因為鍾意收藏古董，喺賭王支持下開設禦珍閣。佢多年前講過，最鍾意康熙時代嘅精品，瓷器同白玉都係佢杯茶，尤其係白玉，靚嘅白玉亦好難搵。
仔女冇興趣接手
佢指，經營一間古董店，要兼顧好多事情，要不時去世界各地買貨、睇貨，冇時間真係好難兼顧，或者將來有機會先再開番間古董店。不過最重要，可能係因為三太嘅仔女冇興趣接手。
三太透露，大女何超雲幫佢睇緊投資物業生意，禦珍閣係自置物業，結業後，舖位放租，正係由何超雲負責處理。
今年2月，三太以5,700萬元，買入黃竹坑道21號環匯廣場地舖、外牆廣告及1樓一個車位，亦係何超雲睇過，交畀三太拍板決定。三太形容何超雲𠵱家懂事，學緊做生意，佢會畀仔女自由發揮咁話。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.apple.nextmedia.com
