智取大市：超殘股釋放價值
■百盛唔少百貨店以自有物業經營，呢啲物業賣出去相當值錢。 資料圖片
恒指最強時間應該已過，但短期內轉為日升日跌又不出奇。每次短暫炒風則限於一日起兩日止，然後好快又有震倉，咁樣搞你兩三個星期，都足夠玩謝你。暫時市場上的即市不乏機會，噚日融創（1918）朝早敢衝
，下晝已派彩，最緊要肯食糊，密食當三番。
市場上貴到嘔嘅股票多的是，平嘢就升一隻少一隻。新百貨（825）之前獲新世界（017）提私有化，順客隆（974）又被全購，皆因百貨零售股估值太殘，個別案例甚至拆散資產套現，都貴過公司市值多多聲。
百盛集團（3368）舊年以連同債項作價23.2億人民幣，賣出北京朝陽區物業，收番19億人仔，淨賺9億人民幣，套現所得已經係市值六七成。只要百盛願意執多幾間舖、賣埋啲物業，就能夠釋放更多價值。
百盛近期執舖進度，正合市場胃口，其中北京百盛執嚇執嚇剩番一間復興店，為咗等大批coupon畀客戶有機會用，所以執剩一間基本上已經不能再執。百盛唔少百貨店以自有物業經營，呢啲物業賣出去就相當值錢，同時執舖等同止蝕，令賬目改善，一舉兩得。百盛未來只要繼續賣舖，股價就會升，無理由唔做落去。
晉佳
http://www.fb.com/advanceguy1
本欄逢周一、三、五刊出
97年主權移交至今，香港前進還是倒退？「蘋果」與你細數廿載風雨。
【回歸二十年】專頁：http://hksar20.appledaily.com.hk
晉佳
智取大市 - 晉佳 舊文
來源 source: http://hk.apple.nextmedia.com
