唔好當正無息加
2017年06月14日
美國議息前夕，港元匯價跌穿左7.8水平，主要原因係自美國加息後，香港銀行一直未有跟從，港美係兩地息差擴濶下，開始觸動左聯繫匯率嘅套戥機制，有資金沽港元、買美元，照呢個狀況，若然美國係呢個星期決定加息，香港跟加的機會大左。
有銀行界原本估本地
資金充裕，可能今年香港都未必加息，而家情況就未必一樣。
港元匯價弱有跟加壓力
今年係回歸20周年，好多人興講吓呢20年嘅變化。係財金方面，作為本地最重要貨幣制度嘅聯繫匯率依然維持，但過程中都有唔少微調。
九七回歸後一個月，亞洲金融風暴爆發，跟住有大鱷狙擊港元，當時聯繫匯率比較簡單，有人狙擊沽空港元，抽資立即就牽動套戥機制，扯高息口，當時試過拆高見300厘，成個資金市場俾人抽乾晒，資產價格大跌。
後來金管局總裁任志剛總結經驗，加大左資金池，防止被人挾息嘅慘痛經歷。
過去幾年資金大量流入香港，部份係尋求入內地投資，令到資金池大左好多，所以雖然美國加息，香港都無需跟加，但如果資金未來持續減少，咁香港就要跟加甚至追加。
九七年嘅夾息令到樓價大跌，百業蕭條，後來政府發覺呢個係大鱷有意識嘅狙擊行為，於是入市干預。同樣情況而家會唔會重演？好多人就話唔會，當中包括財金高官。
陸羽仁都覺得歷史係唔會簡單咁重複，但要留意嘅係香港都有內部經濟過熱，同資產泡沫嘅毛病。過去一個月，沽空機構接連出手向個別公司發動攻勢，部份目標仲係過千億元市值嘅恒指成交股，反映左大市整體雖然唔係好貴，但個別股份同板塊就已經偏高。
睇番外圍嘅情況，好似科技板塊近日就接連被唱淡，顯示投資者對股市短期戒心增加，所以如果要買股，都係買番啲穩穩陣陣嘅落後股份，對於啲估值貴、同時累積升幅大嘅股份，始終都係小心啲好。
內房股繼續有表現
恒指最打完風後反彈，最多升過175點，見25883點；收報25852，升144點；國企指數報10525，升39點。成交額798億元。多隻內房跑出，過去升幅唔算多嘅萬科(2202) 升2%，收報21.9元；龍湖(960) 升4.5%，報15.42元；融創中國(1918) 大升12%，報15.38元。
今年新股市場表現麻麻，散戶認購興趣唔大，但昨日兩隻首掛新股表現就唔差。
大隻啲嘅內地生物製劑服務供應商藥明生物技術(2269) 首日上市，股價開報25元，持續向上，最多漲39%，高見28.7元，全日收28.25元，較上市價20.6元，高7.65元或37%；成交達1.436億股，涉資38億元。不計手續費，每手500股，帳面賺3825元。
藥明是次來港上市共發售1.93億股，其中10%公開發售獲逾36倍超購，公司啟動回撥機佔比增至30%，認購一手中籤率約80%；股份以招股範圍上限定價，集資淨額33.3億元，主要用作還債與拓展包括建造上海及無錫基地新設施與購買設備。
另一隻係幕牆工程分包商信越控股(6038) 開報0.5元，高低分別為0.56元及0.45元，全日收0.455元，較上市價0.41元，高4.5仙或11%；成交4.46億股，涉資2.22億元。不計手續費，每手10000股，帳面賺450元。
呢兩隻股都有肉食，睇概念當然係藥明好的，佢做得好啲，有利其他排隊上市的新股。
陸羽仁
金融High Tea 舊文
來源 source: http://hdfin.stheadline.com
