Money Walker：環球股市未到見頂時
■環球股市見頂大跌前的兩大技術訊號，暫時尚未出現。 資料圖片
上周五有大行唱淡美國科技股，搞到環球股市周一齊齊震盪，不過周二已經回穩返，筆者亦猜測，環球股市未到見頂大跌之時，事關以往環球股市見頂大跌前，會出現嘅兩大技術訊
號，暫時都未見影。
先講第一大跌市訊號──MSCI世界指數同美國國債回報差距。環球股市屬風險資產，美債則屬避險資產，兩項資產嘅回報大多數時間理應存在一定差距。唯獨2007年同2014年，亦即兩次環球大跌市前一年，卻出現例外。MSCI世界指數與美債回報兩者喺2007年回報相若，分別係9.6%及9.1%，僅距0.5個百分點；2014年情況亦類同，MSCI世界指數與美債回報分別係5.5%及6%，亦只差0.5個百分點。
股市同債市差距拉近，反映兩派對後市持不同睇法人士於市場上押注相反方向，互相角力。預見跌市嘅淡友抬頭並增持美債，但繼續睇好後市嘅好友則無改買升股票立場，結果導致兩項本應走勢相反嘅資產，回報拉近至差不多水平。好彩嘅係今年頭5個月，MSCI世界指數累計上升近三成，但美債期內回報只有5.1%，兩者表現仍有相當距離，反映環球好淡友勢均力敵局面暫時未至。
至於第二大跌市訊號則較簡單，就係MSCI世界指數於超買區附近徘徊，是否已經相當一段時間。回顧2008年與2015年環球大跌市前，MSCI AC世界指數月線嘅9天RSI（相對強弱指數）都有一段長時間於70嘅超買水平徘徊，其中2008年跌市前嘅一次更長達數年，2015年跌市前嘅一次亦為時近一年半。
MSCI AC世界指數月線嘅9天RSI已升至70嘅超買區，最新報78。但該指數自今年3月起先開始觸及70或以上超買水平，徘徊超買水平嘅時間只有幾個月，遠較以往兩次大跌市前出現嘅超買期短，按此推斷，環球股市理應尚未見頂轉勢。
El.
http://fb.com/moneywalkerhk
本欄逢周三刊出
97年主權移交至今，香港前進還是倒退？「蘋果」與你細數廿載風雨。
【回歸二十年】專頁：http://hksar20.appledaily.com.hk
El.
Money Walker - El. 舊文
來源 source: http://hk.apple.nextmedia.com
