中環在線：何猷亨澳博打工一腳踢
■何猷亨（中）噚日低調現身股東會。
賭王與四太梁安琪所生嘅二仔何猷亨，平時多數喺娛樂版出現，噚日澳博（880）召開股東會，竟然見到何猷亨一身藍色西裝，官仔骨骨，拎住公事包低調現身，佢參加完股東會匆匆離開，差啲走漏眼認唔到佢！
上月升助理營運總裁
24
歲嘅何猷亨就讀英國哈羅公學，2014年英國倫敦King"s College工商管理學理科系畢業。聞說，佢畢業後返過澳博做實習，幾個月後，轉去一間初創企業見識一下外面嘅工作環境，2015年底返去澳博正式返工，最初職銜係高級經理，上月升為助理營運總裁，直屬上司係老臣子兼營運總裁吳志誠。
睇番資料，近期澳博同其他公開活動都見到何猷亨身影，好似澳博一間員工中心開幕、澳博澳門打吡大賽頒獎，都見到佢孖住四太一齊出現。
何猷亨入咗澳博大約兩年，聽講乜嘢都要做，細至點樣做荷官，大至出去同人傾project都有佢份。近年澳博投資超過300億元，喺路氹興建新項目「上葡京」，項目涉及零售、餐飲、酒店、賭場，佢亦參與其中。不過，呢個項目都有阻滯，好似之前忽然發生火警，澳博行政總裁蘇樹輝指，會盡量加快工程進度，希望明年能夠開業。
噚日問四太點睇何猷亨嘅表現，佢形容何猷亨係「打緊工」，將來會唔會入董事局就要睇表現。咁都啱嘅，就算係接班，冇理由咁快畀咁大壓力阿仔。
李華華
mailto:LiWaWa@AppleDaily.com
97年主權移交至今，香港前進還是倒退？「蘋果」與你細數廿載風雨。
【回歸二十年】專頁：http://hksar20.appledaily.com.hk
李華華
LiWaWa@AppleDaily.com
中環在線 - 李華華 舊文
來源 source: http://hk.apple.nextmedia.com
