金手指：打死都唔買比特幣
■如果做唔到黃、賭、毒，邊個會用bitcoin呢？ 資料圖片
有日，孫柏文收到個投資評論界後生女嘅短訊：「想請問你會不會有比特幣？」我話冇，佢就追問：「oh，有無心痛？」我就話完全冇。
你可能同嗰位後生女一樣，覺得我嘅反應匪夷所思。特別係作為一個好唔信政府嘅
人、奧國經濟學信徒、Gen X Dotcom嘅一代，牌面上係應該最信呢期升到甩轆嘅各種虛擬加密貨幣。
早喺比特幣創立時，我已經聽過。理論上確實啱曬我呢類思路嘅人，不過喺2013年，就有單新聞，令我卻步，到幾日前，嗰單新聞嘅最新發展，confirm咗我當時嘅感覺係冇錯。
理論上，呢啲虛擬加密貨幣，完全匿名，用戶買乜，商戶賣啲乜，都可完全自由進行。將呢個功能推到極點，就一定係用比特幣做黃、賭、毒。不過喺2013年，當時全球最大收bitcoin嘅販毒網站Silk Road，喺一夜之間比美國政府冚檔。最弊嘅地方，仲要政府有能力充公14萬個bitcoin（現值28億港元）。黃、賭、毒做唔到，咁邊個會用bitcoin呢？不如用美元啦。幾日前，早前啲人為Silk Road創辦人眾籌律師費嘅bitcoin戶口，居然被hold住筆bitcoin嘅「銀包服務提供者」凍結！雖然被網民鬧之後，放生番個戶口，不過你唔驚咩？
再講，早前全球近9成嘅bitcoin交易，都喺大陸進行。點知中央一搵啲bitcoin交易所總管，就忽然落閘話唔畀提款，最後擾攘一輪後，先話可以有限額咁攞錢走。黃、賭、毒做唔到，連走資都死埋火。
呢排所有呢啲虛擬加密貨幣升得好勁，你有興趣買？咁我只可以話我仲有啲90年代Yes card，你想唔想買？
孫柏文
獨立股評人
http://www.fb.com/shuen
本欄逢周二刊出
97年主權移交至今，香港前進還是倒退？「蘋果」與你細數廿載風雨。
【回歸二十年】專頁：http://hksar20.appledaily.com.hk
孫柏文
金手指 - 孫柏文 舊文
來源 source: http://hk.apple.nextmedia.com
