財經評論：劏房擺明歧視肥人
■161方呎的劏房示範單位，睇嚟係瘦人限定。 資料圖片
上星期五，由資深投資者盧華旗下發展的深水埗Ava61，開放示範單位，記者「有幸」參觀一個只有161方呎的示範單位，身高6呎，體重逾100公斤的小記，一個人行入去，基本上其他同行的記者行家統統要「讓路」，個迷你浴
室，要打側個身行入，連轉身都有困難，發展商好像同緊小記講，「肥仔，個單位係瘦人限定」。
數嚇數嚇，加入蘋果3年有多，前前後後睇過的劏房單位數目，都差不多有二、三十個，私樓有，公屋也有。
當中最令小記難忘的，一定是長實（1113）大埔嵐山。2014年11月，發展商開放予傳媒參觀當時仍未入夥的「現樓相若單位」，當中劏房A室，僅得180呎，只花六步已經行曬全間屋，冇雪櫃、冇洗衣機、冇爐頭，又望到山墳，嘩然程度，拍得住有人同你講，中國足球隊取得世界盃冠軍。咁樣樣的一手新盤單位，真係有傻人肯買嗎？
之不過，當小記見到本月初嵐山中層實用181方呎開放式戶，以338萬元成交，呎價高達18,674元，一手原業主不足三年，單位升值了81%，扣埋一成SSD，賬面仍賺約117.7萬元，原來，傻的是自己。
反之，一個公屋的劏房，相對感覺人性化，上年3月，直擊鑽石山鳳德邨「劏房王」，面積146方呎，細過嵐山，但有獨立廚房及廁所，而且有窗，不是黑廁，裝修一般，多件家具仍未搬走，但感覺不算太迫，只是感覺舊，大廳空間四正，未算太狹窄。今時今日，住到私樓，可能只是追求到生存；住到公屋，反而可能追求到生活。
記者：黃嘉銘
97年主權移交至今，香港前進還是倒退？「蘋果」與你細數廿載風雨。
【回歸二十年】專頁：http://hksar20.appledaily.com.hk
財經評論 舊文
來源 source: http://hk.apple.nextmedia.com
