財路：財險長線掂過碌蔗
■保險業要構建一帶一路保險支持體系，財險係產險龍頭，長線掂過碌蔗。 資料圖片
財險（2328）喺一年底橫行咗成年，鬱都未鬱過，講平，財險PE，唔只係內險最平一隻，比對環球其他非壽險類行家，財險亦係平霸！
財險啱公佈今年頭五個月原保險費收入1,449億元人仔，同比增
加9.7%，主打瓣數keep住有唔錯增幅。仲要咁睇，中國保監會上個月頭，發指導意見，保險業要構建一帶一路保險支持體系。據行內專業人士估計，一帶一路涉及基建投資，達到8萬億美元，呢壇製作，俾到非壽險類內險企業，勁厚商機。財險又係行內產險龍頭，長線掂過碌蔗。
財險現價12.98元，喺一年底部橫行區浮沉，累計跌咗7%，單比國指同期20%升幅，財險都落後幾條街。場內專業預估，財險今、明兩年EPS1.62港元同1.76港元，財險呢個殘價今、明兩年預測PE得8倍同7.4倍。
財險到上年尾，權益類證券同共同基金總值670億人仔，唔係嘢少。尤其內地股市，係等大爆升，財險投資瓣數大增值，預測PE分分鐘仲平。
場內內險，國壽（2628）一年累升咗46%，今、明兩年預測PE上到23倍同19倍、新華（1336）17倍同13.7倍、太保（2601）16倍同14倍、中國太平（966）同平保（2318），兩年預測PE都喺12倍同近11倍，財險至平。
話財險主打瓣數唔同，不妨同海外非壽險類行家比較。美國丘博（美CB）今、明兩年預測PE14倍同13.6倍、TRAVELERS（美TRV）14倍同13.5倍，英國HISCOX（英HSX）18.6倍同17倍。又係財險至抵搞。
煲財險，當翻半番到19.6元，目標價嘅明年預測PE都係得11倍，仲未追到上邊美國同業個預測PE水位！
錢雋
細價股專家
本欄逢周二刊出
97年主權移交至今，香港前進還是倒退？「蘋果」與你細數廿載風雨。
【回歸二十年】專頁：http://hksar20.appledaily.com.hk
錢雋
財路 - 錢雋 舊文
來源 source: http://hk.apple.nextmedia.com
