中環在線：
股壇權相佑挑機蝙蝠俠
■譚朗蔚7月股talk張海報大抽沽空機構「葛咸城」水。
靚佬股評人鄧聲興遇上勁敵了，富昌金融研究部總監譚朗蔚最近為7月一場講股talk影宣傳海報，驟眼睇，佢呢個側面有幾分似韓星權相佑（佢真人都青靚白淨嘅）；佢仲好識抽水，沽空機構最近玩轉港股，佢就用其
中一份沽空報告條題「Hong Kong deserves a better hero」起名，水塘嘅水都俾佢抽乾了。
話說沽空機構「葛咸城」早前狙擊藍籌股瑞聲（2018），搞到瑞聲股價大跌，惹來另一間沽空機構「匿名」出報告力撐瑞聲，報告以「HK deserves a better hero」為題，寸葛咸城以蝙蝠俠名義主持正義，但報告內容有錯誤之嫌。譚朗蔚今次借匿名報告條題，擺名都係向蝙蝠俠挑機喎。
「做財經都要娛樂嚇股民」
譚朗蔚不諱言，家陣舉行講股talk係要有gimmick，做得財經演員都要娛樂嚇股民咁話。佢2015年加入富昌，每半年辦一次講股talk，之前試過以唱歌同話劇形式講股。
至於7月個talk有乜花臣或者有乜投資貼士，佢仲度緊，不過佢畀個貼士，指海報入面，佢同一個戴住「面堅尼」嘅人面貼面，大家都知內地大媽最鍾意用面堅尼，即係話呢，下半年大家都要同大媽面貼面咁互動，投資同內地關係十分密切。
李華華
mailto:LiWaWa@AppleDaily.com
97年主權移交至今，香港前進還是倒退？「蘋果」與你細數廿載風雨。
【回歸二十年】專頁：http://hksar20.appledaily.com.hk
李華華
LiWaWa@AppleDaily.com
中環在線 - 李華華 舊文
來源 source: http://hk.apple.nextmedia.com
