實力取勝 - 陳承龍 2017年6月9日
【實力取勝】炒股必備三樣嘢（陳承龍）（第128期）
2017-6-8 17:30:38
又到一個禮拜最痛苦的時刻，就係交稿。講真，要講的，已經在每天的節目講曬，要寫就一定更勁的內容。好啦！今次就講一些炒股心法畀大家啦。事實上，炒股票最緊要有三樣必備的，一是本錢，二是膽量，三就是eq。
第一樣都係大家最唔夠的，包括小弟在內，我都唔夠，所以要識走位，用最有限的資金搵最快的錢，明知自己手上資金不多，就要行動快速，就以近期資金轉攻大價股為例，你可以選擇買一些認購窩輪走轉快，畀個活生生例子大家，小弟早前衝了隻銀河購輪（28444.HK），升了近一倍，之後你可以先食一半，即餘下的是免費貨，可以不再睇，跟住再將套現的資金再博下一隻，那就貨如輪轉，除窩輪外，股票也如是，最佳例子有中國家居（00692.HK），我早個幾月前在不夠0.3元介紹，之後也升逾1倍，照辦煮碗，又是沽一半，餘下的又是免費貨，而套現了的錢又可以博下一隻。是不是講得完美呢？但手風順是可以的，因為我試過，當然又是睇市況啦。
第二是膽量，講真，不是個個人都可以有膽量，如果你自問唔輸得的，我勸你不要亂買股仔，因為你會好辛苦，之後會受負能量影響，繼而影響健康。其實，做人大膽少少無妨，好似近期個升市，當身邊個個都話怕怕唔敢高追，你就應該大膽少少買些貨，好多時都中，當然這個涉及相反理論，不過如果你冇膽，就好難做些同別人不同的事。還有，尤其大升市，尾程通常爆得好厲害，幅度可以好驚人，但這些錢不是個個有膽去賺，但我會好願意去博，短線不妨揀些破了高位的股份，那股爆發力可以好厲害。
最後就是eq，講真，不是個個人有，好多人輸了，個人的心情都會好差，之後就會影響判斷能力。如果大家又睇開我做節目，我輸了錢都面不改容，反而會諗方法點救，例如諗定要不要止蝕，定係加碼溝貨。炒股票同賭馬不同，跑完一場馬只得兩個能性，一是撕飛，一是收錢，最多咪輸曬，但輸曬就連本也收不回，但股票不是動物，通常輸極都有個譜，點都有得走人，用呢種想法去面對，個人會舒服好多。
其實上述都是一些好皮毛的事，但你能夠具備呢三樣必備，就算要輸錢，我包你都會覺得舒服。
至於短線心水方面，我都係覺得重磅股會好些，因為目前資金就是追逐這類股，而且揀些之前被沽空得勁的股份，中資水近期最鍾意夾呢類空倉，最勁例子就有恒大（03333.HK），升到你信為止。我再重申，5、200、2822同2823，絕對有權夾爆，自己睇實。
實力取勝 - 陳承龍 舊文
來源 source: http://www.winmoney.hk
