【實力取勝】581 2.0（陳承龍）（第142期）
2017-9-14 17:30:06
話咁快又一個禮拜。過去呢個星期，指數上落唔大，但係二三四線股就各自各精彩，由此可見，市場是有資金，只要走勢對辦，就去馬。根據成班策略王同事估計，呢轉細價股炒風應可維持一至兩個月，原因好簡單
，因之前很多人在大價股身上贏到，尤其一隻騰訊（00700.HK），如果今年年頭持有到依家，起碼贏到100元，只要取當中20元的盈利來炒細價股，已足以令一隻股仔炒到飛天。
事實上，有很多股仔的股價仍處於極低殘的水平，確實吸引到好多資金埋位，最好有盈利支持，最佳例子就是恒騰（00136.HK），求其有幾千萬贏，都已經足以令股價升近兩倍。
如果嫌股仔太過鬼，可以不妨考慮一些落後周期性股份。小弟上月在《十二點半陳承龍》推過隻中國東方鋼鐵（00581.HK），結果由4皮舞到上最高7皮，一個月狠升七成半，依家仲企緊高位！ 而隻西王鋼鐵（01266.HK），就好有勢成為581的二點零，先睇2.6元NAV價已經好合理，即係連隨破埋歷史高點2.4元，一旦成事就可望長放紙鷂，以PE計中線睇3.73元，長線睇6皮幾7皮都夠曬條件。
1266絕對係大落後，自從母公司西王集團聯同山東省政府接掌齊星集團後，已足見背後實力雄厚，而且注資商機更係排住隊咁擺在1266面前。
1266主產建築基建、及機械加工設備業用的普通鋼及優質碳素結構特種鋼，尤其係特鋼，更係行內精英。特鋼在好多領域都係主要材料，而發改委已於年中將所有低質「地條鋼」產能全部去除，餘下只有1266呢類優質產商獨佔市場，加上一帶一路、雄安市場等龐大需求、及價較去年同期已飛升逾倍，令今年業績開始大躍進！
上半年，1266純利3.09億人仔，按年大增91%，相當於舊年全年盈利的94%！照推全年應可賺6.2億元，相當於每股盈利0.37元，以同業PE最少10倍計，已可上到3.7元！
不過，1266更大憧憬係未來3年，蓋早於年初已開始建設一條大產線，年產能過百萬噸，再將現產能大增一半以上，而第一期則於明年完工，第二期在2020年投產，再推算落去，只要保持中績近6%的純利率，每年就可大賺十幾億銀，而當下1266市值僅三十幾億，預期PE只係3倍，所以上番合理PE，長線睇6皮7皮，就係呢個原因！
內地基建項目如新鐵路等紛紛上馬，1266產線又近雄安區，最新更獲北京國金衡信認證旗下鋼車軸鋼坯質量，意味汽車訂單勢必大增，所以來自各類特鋼產品的未來大需求源源不斷，長做長有！
1266的最新NAV為2.6元，要做北水成員，每股最少要2.5元，而佢2012年初嘅上市價亦要2.65元，所以首先上番呢個位完全好有曬理由，而且大股東持股近75%，年初向圍內發放的購股權少得淒涼，只60萬股，作價亦要1.22元，惜貨態度明顯，流通亦緊拙，十足十隻581咁，所以博1266，係要博強大未來，以581由今年唔夠兩皮起喪升到依家陣近7皮，1266若上演同一故事，分分鐘又係幾倍計，真係要好好實也！
實力取勝 - 陳承龍 舊文
來源 source: http://www.winmoney.hk
