用秒錶炒手機股
2017年09月15日
蘋果新機iPhone X面世，當中最有話題係佢採用嘅面容辨識系統，大量同面容辨識有關的熱話已經係網上湧現，好快仲出埋公仔漫畫O添，呢樣或者都反映咗消費者或對手一早開始消化呢個消息，所以新機公佈後第二日，蘋果股價再輕微回落咗0.75%，報收159
.65美元。香港嘅手機設備股似乎反應仲慢咗啲啲，昨日繼續炒上，出現妹仔身價貴過小姐嘅情景。
蘋果新機推出，股價已經偷步創咗新高，係月頭曾創出164.05美元嘅新高價。有分析估計，蘋果推出呢隻變化較多嘅新機iPhone X，以高溢價出售，可以推動蘋果股價見200美元，屆時蘋果股價會升逾20倍市盈率，市值逼近10000億元。雖然係咁，如果考慮到蘋果來年盈利會有較大增長，佢嘅市盈率可能都係15、16倍，唔算係一個超高水平，呢個估值係因為佢嘅產品有好強黏性，加上預期佢透過周邊產品再提高盈利而得嚟。
蘋果好消息後都要唞唞
從呢個角度嚟睇，美國科技股嘅分析員都幾冷靜，無俾蘋果成功嘅推廣手法蒙蔽咗雙眼。美國投資市場成熟，科技係主要嘅板塊，大批分析員日日係度做調研，好似蘋果呢啲已經幾成熟嘅公司，業績有路可捉，分析員對佢哋嘅要求都幾嚴苛，所以就算新機其實已經叫做交到貨，一句話佢出貨遲，股價都要唞唞先。
同美國嘅科技股比，香港嘅手機設備股，遇到嘅要求就無咁嚴厲，昨日幾隻手機設備股仲係食住蘋果效應炒緊，個別再創新高。睇番佢哋嘅估值，舜宇光學(2382) 升3.3%，收報128.1元，市盈率炒到去98倍。另一隻瑞聲科技(2018) 收142元，市盈率都有39倍，其他相關的手機設備股，好多都炒到歷史新高水平。
陸羽仁從來都有個睇法，就係全球科技股嘅資金流向，都受美股影響，通常都係美股升先，香港跟炒，所以炒呢類股份，必須留意領先股份表現。如果從基本因素睇，蘋果而家市盈率仲平過手機設備股好多，除非大家覺得呢啲接單供應商嘅科技水平同競爭力勁過畀單佢嘅主要客戶，否則邊個抵買好易計到，所以就算蘋果股價真係有機會炒上200美元，炒本地手機設備股都要睇住個秒錶倒數嚟炒。
眾安有熱度平保都照跌
大市全日乏力，恒指收報27777，跌116點；國企指數收報11101，下滑85點，成交金額965億元。個市唔算跌得多，主要係騰訊控股(700) 頂住，逆市升0.9%，收報337元；中國平安(2318) 老總有股份的新股眾安路演反應唔錯，但中國平安自己都照跌0.8%，報61.75元，平保業績唔錯，如果有興趣買眾安，都可以考慮候低買啲博反彈。
收市後新地(016) 6月底止全年度業績，股東應佔溢利417.82億元，按年上升27.91%；每股基本盈利14.43元；派末期息3元，同比增加7.14%。撇除投資物業公平值變動影響後，基礎盈利259.65億元，按年升7.4%。期內物業銷售收入386.29億元，盈利貢獻升1.8%至119.17億元。按所佔權益計，合約銷售額約524億元破紀錄，另外租金收入218.97億元，淨租金收入171.42億元，兩者按年均上升4%。如果計業績佢去年真係幾靚仔，來年相信都仲好正。
陸羽仁
金融High Tea 舊文
來源 source: http://hdfin.stheadline.com
