借錢抽新股無著數
2017/09/28 09:18:38
網誌分類: 經濟
美股反覆收高，主要因為聯儲局主席耶倫繼續逐步加息的言論，令12月再度加息的預期升溫，美債收益率上升，債價下跌，金融股造好，標普金融股指數升1.3%，美銀及高盛股價升逾2%，派息股下跌。杜收市報22340點，上升56
點，升幅近0.3%，標普500指數升幅0.4%，科技股上升，納斯達克指數高收逾1%。
外圍無大事，再講?隻新股眾安(6060)
，佢今日掛牌，據輝立交易場資料顯示，眾安在綫暗盤收報68.6港元，較招股價59.7元高約14.9%。 眾安公開發售部分錄得超額認購約391.74倍，係今年高認購股份。公司益散戶，認購1手中籤比率為100%。以暗盤價，按每手100股計，不計手續費，每手帳面賺890元，扣埋手續費都賺到餐茶。
大戶就媽媽聲啦，因為分得比例低。我搵到個入飛在國際認購申請1億元的大戶，佢只分到2萬股，按暗盤價計，唔計手續費帳面賺17.8萬元。
你可能會話，賺17.8萬都唔心足，大戶正衰人。但佢地有佢地的理據。大戶話在配售部份入飛申請1億股，雖然唔使借錢唔係用真金白銀，但係入咁大飛都真係擔心風險。最關鍵係大家都睇到隻嘢定價去到幾盡，唔係好易升4、5成，若然係10幾%回報，冒的風險較大。
若然在截飛的那一天大市急跌，要手快去抽飛，否則你唔抽飛人地抽咗，之前大市劇跌，申請1億，隨時派5000萬貨俾你，一開市跌三成，唔見1500萬，真係痛到入肉。當然截飛後個市都可以跌，但只要無得抽飛，分到的比例唔會多，咁輸極都有條數。
如今分到咁少股，大戶媽媽聲，因為分配方式係益散戶，所以大戶分得咁少，試想申請一手的是二中一，或三中一，而唔係100%中籤，大戶分得的股份比例也會提高。其實在配售部份的大戶如是，在公開認購入大飛的大散戶也如是，如果一手的中簽比例降低，這些大散戶的分股比例也可以提高。
大戶話用過1000萬的風險(發生的機會或許只是5到10%)，去博10幾萬回報，值博率太低，下次佢都唔制。試想若申請1億貨分到俾佢的股份多兩倍，分到6萬股，升幅又有30%，咁佢的利潤有107萬，風險和回報就比較平衡。
睇完眾安呢種分配方法，更確認大散戶借錢抽熱門新股無著數，又要利息成本，加埋無乜肉，仲要冒大市急跌的風險，不用等個市回去撈底熱門股仲好啲，因為即使睇錯，一日就斬倉，輸的反而有限，唔使好似入大飛認新股那樣，連膽汁都輸埋俾佢。
陸羽仁
回應總數
陸羽仁 BLOG 舊文
來源 source: http://blogcity.me
