眾安大戶分得少
2017年09月28日
呢排市況靜靜地，中環茶友傾吓有乜好搵食，有茶友係中銀香港(2388) 長期股東，咁多年執左唔少銀，佢笑言今日嘅百年紀念鈔開賣喎，係咪可以掃貨博短炒呢？
中銀過去紀念鈔全部都有升值，呢次發行紀念鈔合共有500萬張，係歷次之冠，因此有啲貨幣店
覺得佢升值潛力有限。茶友性格包拗頸，話世事無絕對，當年中銀香港上市夠曾經破底啦，但後來股價長升長有，累計已經升左三四倍，你又點知呢次唔會爆冷呢？
中銀紀念鈔有鐵粉捧場
茶友係中銀香港鐵粉，必定會入票捧場。睇番過去好多銀行發紀念鈔嘅紀錄，發行量多少只係影響因素之一，記得年前有另一間發鈔銀行出紀念鈔，數量相對較少，結果反而破底，事後睇番原因之一，可能係因為發行宣傳活動唔多，而且呢間銀行平時發鈔量唔多，分行亦少，客戶基礎細啲，所以就算發行量少，結果都炒唔起，所以紀念鈔升值潛力，唔係只係睇發行量咁簡單。
有研究過呢次發鈔機制嘅人話，今次中銀香港嘅安排有兩點利好因素，一係可以網上認購，方便市民申請，會增大左需求；二係今次用實名制申請，而且規定要用香港身份證認購，咁即係只有香港人可以買，內地買家若然想要，就必定要喺二手市場入貨，客觀上有利形成二手市場。
講到底，認購紀念鈔應該係要嚟收藏，長遠嚟講，用現金買紀念鈔擺喺度，都應該會保到值，短炒升唔升值唔應該係主題。如果要講投資升值，正路啲係諗吓認購新股，好似隻眾安(6060) 今日上市，聽聞有大戶喺國際認購申請一億元，結果分到兩萬股。
本來呢隻概念股都已經幾熱，後來因為日本軟庫旗下基金大手入貨，令國際反應更加勁，結果大戶入飛都攞唔到幾多貨。
昨日該股暗盤開報66元，收報68.6元，較招股價59.7元，升8.9元或14.91%，兩萬股有近十八萬落袋，叫做好過無啦。
掛牌前夕添炒味
眾安保險公開發售部份錄得超額認購約391.74倍。公司啟動重新分配程序，公開發售股份總數增加到初步可供認購發售股份總數嘅20%，認購一手中籤比率為100%。股份每股定價為59.7元，為招股上限價。軟銀獲配7190萬股，帳面已執4.2億元。散戶一手100股唔計手續費執890元，呢個係大戶同小戶嘅分別。
喺眾安首掛前夕，長和(001) 同螞蟻金服宣佈組成策略夥伴聯盟，將會組成合資企業，共同營運電子錢包「支付寶HK」，進一步整合線上線下支付服務。
呢次合作令人憧憬馬雲旗下嘅螞蟻金服會唔會加快嚟香港上市，呢個猜測可能增加左佢有份嘅眾安短炒味道。
等緊熱股掛牌前，港股先跌後升，恒指收報27642，漲129點；國企指數收報11035，上揚67點，成交金額858億元。
當炒嘅都係原先炒開嘅板塊，汽車股再開車，比亞迪(1211) 升2.6%報75.8元；吉利(175) 升2%報22.65元。
市場憧憬澳門博彩業受惠即將展開嘅十一黃金周，濠賭股造好，新濠國際(200) 升6.7%報22.2元；銀娛(027) 升2.7元報54.05元。另外內房股跌得急彈得勁，華南城(1668) 升17%報2.07元；世房(813) 升12%報17.38元；融創中國(1918) 升11%報35元；萬達酒店(169) 升10.6%報1.7元，早兩日唔怕死入場撈底已經可以食胡。
陸羽仁
金融High Tea 舊文
來源 source: http://hdfin.stheadline.com
