中環在線：房屋新政出爐 小超人封口
■小超人噚日開完會，離開酒店講聲「唔該」就笑住鬆人。
噚日係特首林鄭月娥公佈首份施政報告嘅大日子，房屋政策乃全城焦點，啱啱遇著剛剛，長實（1113）噚日就住一宗收購召開股東特別大會（EGM），一班要開會嘅高層早有準備，就係一齊封口，主席超人李嘉
誠直情因為有事no show。
近日全城關注林鄭嘅房屋政策，難得李氏現身，仲唔係傳媒攞回應嘅最佳機會？可惜，李氏似乎唔想講咁多，小超人李澤鉅（Victor）噚日開完會離開酒店，只係講聲「唔該」就轉身笑住口鬆人。公關大員就話，朝早好多嘢做，大家未有時間研究施政報告內容。
超人no show股東會
超人亦因為有事未能出席，由Victor擔大旗，一排冇見，Victor好似清減咗，公關大員反問「乜有瘦到咩？會唔會係剪咗頭髮咋？」
是咪真瘦就唔知，不過今次開EGM，聽講股東們都幾勤力，將重點放喺公司新收購嘅德國能源公司Ista，追問未來5年回報，Victor叫股東唔使擔心，預計除稅後股本回報率（ROE）有雙位數，仲好有信心咁話Ista夠穩陣，做供電同用水，唔會太受經濟影響。
小股東亦關心股價，伺機呻長實股價跑輸大市，Victor就安慰話，唔可以齋睇回報嘅，仲要睇埋資產質素。呢句說話嘅說服力似乎一般咗啲。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.apple.nextmedia.com
