智取大市：恒指破頂有點伏
■恒指雖然喺高位附近，但觀乎股價走勢，似乎整體大市進入派貨時段。資料圖片
單睇恒指，仍然喺高位附近，距離高位爭嗰300點咁大把，一日就可以破頂，但睇年初至今嘅「傳統」強勢股如內房股、汽車股、科網股，踏入今個星期，喺恒指升百幾點時，呢批強勢股勉強隨大市上升，
恒指回返百幾點時，呢啲強勢股就已經跌凸曬。升市時資金流入落後板塊，但喺恒指偏軟之際，落後股原來一樣打返曬落去，似乎整體大市進入派貨時段。強勢股Chok住調整、龍尾股難予人信心，再出出入入都難有好成績。
恒指反映嘅技術形態或許未夠清晰，咁不如轉睇涵蓋港股市值達到85%嘅MSCI香港指數，照計量度港股趨勢更精準。
MSCI香港指數相比2007年高位，高出15%左右，走勢遠遠強於恒指。以周線圖睇，MSCI香港指數嘅9周RSI呈四頂背馳，MACD線維持喺海嘯後以來高位嘅400水平橫行咗近4個月，形成罕見慢牛強勢，然後最近形成今年初至今首次沽售訊號，反映中長線超買情況相對恒指更明顯，更遠超港股大時代高位時。
MSCI香港指數喺高位出現周線圖MACD沽售訊號，以近50年往績計，好則進入數月調整，衰則熊市，並至少要等周線MACD回落到接近0水平，先有機會見底，通常弱返兩三個月走唔甩，睇嚇今次又點。
晉佳
晉佳
智取大市 - 晉佳 舊文
來源 source: http://hk.apple.nextmedia.com
