Can Bank - 散子 2017年10月3日
Can Bank：中秋月餅概念股
■月餅市場非常賺錢，一啲大型餅店只係靠中秋已經賺夠成年錢。 資料圖片
本周四是中秋節翌日假期，以呢句開頭，除提醒打工仔今個禮拜仲有假放之外，主要係想趁大家剛過完long weekend仲有少少holiday mood嘅時侯，同大家分享一下月餅的事。
放假期間，散子喺屋企聽到散子媽同佢個妹，即係散子姨閒談今年月餅難求，尤其是美心，除咗佢新出流心月之外，原來傳統月餅亦都好難買到。佢兩姊妹主要分享買月餅心得，內容唔詳細討論，相信每位母親都有唔同心得。
呢件事又引起筆者聯想起8月底一單突發新聞，主要係有人帶120萬去買美心月餅券（詳情大家有興趣可以google一下）。可見月餅真係有價有市。
其實月餅市場對於餅店來說一向都非常賺錢，有做餅店朋友都曾經同散子講過，其實大型餅店唔少都只係靠中秋已經賺夠成年錢，中秋都真係養起唔少人。
無奈，香港無乜中秋概念股，大型餅店如大班並沒有上市，至於美心則由牛奶公司持有50%股權，而牛奶公司只在新加坡上市；傳統餅舖如恒香、榮華等均沒有上市，只有聖安娜由利亞零售（831）持有。
本周為內地十一黃金周，雖然引起內地部份城市大塞車，但縱觀來港消費的旅客仍不少，消費零售似乎仍可期待。
散子
Can Bank - 散子 舊文
來源 source: http://hk.apple.nextmedia.com
