笑到最後：買爆窩輪推正股？
■筆者認為，衍生工具買爆會推鬱正股，並唔正確。資料圖片
《蘋果》財經即時新聞係高明每日必睇嘅新聞來源，因為齊同埋快，值得所有炒股人士長期駐守瀏覽。最新即時新聞有一論調：買爆輪會推鬱正股，正股升、輪價再升，無限輪迴。高明唔相信世上有此發達方程式。
回到7月
底，該月係全年升得最勁嘅一個月。當時高明身處嘅辦公室彌漫狂牛氣氛，已經乜都講得出口：「正股用嚟短炒，窩輪先要長期揸」、「點解日日都大賺？」、「我哋買咁多輪咪推鬱隻正股？」當時全辦公室人都睇建行（939）至少上7蚊，恒指重上2015年高位，買咗唔少牛證同窩輪，坊間亦有唔少衍生工具達100%街貨。
結果？金管局增發外匯票據配合北韓試射導彈，大市三日跌991點，百分比計跌好少，但衍生工具已可全軍覆沒。大跌一開始，高明持有嘅一隻建行牛證已犧牲，心諗：大升市無理由咁跌法，即刻將全數衍生工具止蝕，先得以保命。事後，高明將上面三句金句寫低，貼喺電腦前面，視為「三大妖言惑眾」，往後再有人咁講就要小心大市短期見頂。果然，到上周二有專題報道講大陸人買爆輪推高正股，周三大市即跌300點。
股價短線波幅靠憧憬及資金，長線都係睇業績。買爆輪推鬱正股論係推斷資金湧入導致正股上升，以騰訊（700）為例，截至上周五被買爆90%以上街貨的牛證共12隻、相當於594.3萬股騰訊正股，買爆九成以上的窩輪共兩隻、相當於228.3萬股騰訊正股。即使上述成交全數即日產生，輪商亦全數買入822.6萬股騰訊對沖，過去五日騰訊平均成交2,574萬股，最多亦只佔單日32%，到翌日便對股價再無影響力。
反問一句，如果理論成立，有人自窩輪被發明後狂買至今，正股咪可以不按估值無限上升，然後衍生工具繼續倍數上升，直到永遠？如果有呢條發達方程式，點解未見十大富豪有人靠衍生工具致富？
衍生工具買爆會推鬱正股，並唔正確，因為好多人用血同肉去證明冇呢條發達方程式。
高明
http://fb.com/bigricetea
本欄逢周一刊出
高明
笑到最後 - 高明 舊文
來源 source: http://hk.finance.appledaily.com
