經濟客艙：
無買樓又無買騰訊點算好
■無論香港或美國嘅無殼蝸牛，人工跑輸通脹同樓價，交租後再應付生活開支，難有本金建倉。資料圖片
網民愁爆話「無買樓又無買騰訊，感覺錯失全世界。」大家都想低樓價時、股王倍升前入貨，但講到底機會嘅嘢，就是可遇不可求。
美國投機之王李
佛摩（Jesse Livermore）嘅金句話：「錢，並非靠炒出炒入賺回來，而是有耐性地坐出來。」坐功，考人耐性外，更在乎克服心魔，自我隔離市場嘅雜音。在討論區或者fb又好，股王或者樓價爆升後，後悔冇追冇買嘅「懺悔文」不時翻炒同翻煲。股市同社會財富分佈同樣咁現實，贏家從來只佔小數，輸嘅永遠係大多數。
無買樓又無買騰訊嘅我，未至於覺得錯失全宇宙。喺香港冇得一炮過買樓，上車不等於致富，但可以每月鎖定一筆錢去供樓，成為現今好多慈父慈母眼中，推動子女努力工作嘅動力。揀咗呢條路嘅乖乖囝囡，肩負25年或30年按揭供樓，他們只成為一代「樓奴」，並非踏上創富之路。
香港個個識搵錢，但係要識錢搵錢，又唔係人人都做得到。美國有項財富調查發現，租樓一族要每月預留小部份資金投資，炒股炒滙炒輪都好，開創被動收入來源，你主動理財，財先理你。咁投資買賣可升可跌，租樓兼炒股唔係同發達劃上等號。不過，現實唔使理財專家話我知，無論香港或美國嘅無殼蝸牛，人工跑輸通脹同樓價，交租後再應付生活開支，食嘅食曬、買嘅又買埋，仲邊有錢去建倉喎。
http://www.facebook.com/seeforcaptain/
Captain Cool
經濟客艙 - Captain Cool 舊文
來源 source: http://hk.finance.appledaily.com
