智取大市：當飛髮佬都話all in騰訊
■毫無疑問，現時已經去到師奶阿叔都識all in騰訊。資料圖片
上星期五恒指升180點，但近900股下跌。有得升嘅股，包括騰訊（700）、平保（2318）、教育股、航空股，都唔關傳統工業事。耐世特（1316）、創科（669）即使係工業股，但係
佢哋產品有高增值元素，具競爭力，股價亦走強，故並非好多人所講，港股近日只集中炒騰訊、平保兩隻，只不過上周內地10月工業增加值數據升6.2%略差過預期，仲要係增長今年第二低，令到冇高增值元素嘅工業股，如龍工（3339）、重汽（3808），以及紙業股玖紙（2689）都要跌，連帶資源商品股都受壓，加上港口股有壞消息，跌股嘅範圍自然較廣闊。
星期六剪頭髮，飛髮佬都識講：「啲人話乜都唔好理，剩係買騰訊就得。」毫無疑問，已經去到師奶阿叔都識all in騰訊，呢種情況叫超買，但目前情況係，股價升完可以再升，超買可以更超買，係咪會耗盡市場資金，一口氣炒爆？目前絕對似投機多過投資。大家將騰訊視為「無價寶」，唔使計估值，至於平保股價對每股內含價值1.6倍，距離成為增值型內險股嘅估值尚遠。投機嘅話，兩隻股要短期爆上，的確有大把理由畀大家去創作，但呢個價先all in長遠死揸騰訊？似乎未必係好主意。
晉佳
http://fb.com/advanceguy1
本欄逢周一、三、五刊出
晉佳
智取大市 - 晉佳 舊文
來源 source: http://hk.finance.appledaily.com
