中環在線：阿里新任命
70/80後分掌天貓淘寶
■阿里巴巴集團宣佈任命靖捷（左）為天貓總裁及蔣凡（右）為淘寶總裁。
江山代有才人出，科網企業要創新，管理層就要跟得上潮流。阿里巴巴最新嘅人事任命，就搵嚟兩位70後、80後分別做淘寶同天貓嘅總裁。
內部升遷 副總裁調任
集團首席執行官
張勇亦相當肯定新人嘅能力，喺員工公開信話，新零售需要更多年輕人嘅新視角、新思維，希望佢哋承擔更多責任，反映阿里由傳統電商平台進一步轉型。是次內部升遷，阿里副總裁蔣凡將調任淘寶總裁，另一副總裁靖捷則出任天貓總裁。
淘寶新總裁蔣凡，據悉1985年出世，年僅32歲。曾經自己創業，之後加入阿里，推動淘寶向數據驅動發展，即通過大數據、人工智能提供個人化嘅淘寶頁面。天貓方面，靖捷係70後，來自傳統品牌同零售企業，商業經驗豐富。
作為阿里電商嘅左右手，淘寶、天貓負責人位居要職，睇番人稱「逍遙子」嘅張勇，當年就係擔任淘寶網首席運營官兼淘寶商城（即天貓前身）總經理，帶領B2C業務高速發展，更於2009年創立雙11購物節，至今已經成為阿里一年一度重點活動，可謂一等功臣。蔣、靖兩位新總裁他日能否問鼎更高職位，做到青出於藍，就要拭目以待了。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.finance.appledaily.com
