中環在線：陸叔撐老友 長揸「林順潮股」
■著名眼科醫生林順潮的希瑪眼科上市，招股反應熱烈。資料圖片
著名眼科醫生林順潮旗下希瑪眼科（3309）上市，招股反應仲熱過閱文（772），近12.6萬人入飛抽，當中包括獨立股評人「陸叔」陳永陸，陸叔話入飛係要支持多年好友兼校友林順潮，兩個人相
識多年，仲透露自己應該會抽中一至兩手希瑪，決定長揸唔沽，兼會上市後買多幾手，撐朋友到底。
份屬中學大學校友
睇番資料，陸叔同林順潮原來都係英皇書院學生，而陸叔1973年喺香港大學化學系畢業，林順潮就1984香港大學醫學院畢業，兩個係中學兼大學校友。
要穩中一手希瑪，至少要拎174萬出來抽，誇張到陸叔噚日聽到都嚇一跳，「嘩，咁咪得個吉？」不過佢話自己應該「坐一手望兩手」，雖然唔係抽頭槌飛，都睇得出陸叔好落力支持朋友囉。
得一兩手對陸叔來講當然唔夠喉，佢考慮等希瑪下星期一上市後，如果股價升唔夠一成就會入市搶貨，咁希望陸叔成功搶到喇。
問到佢會睇咩位沽，佢就大讚呢隻係好股票，仲笑住話得一兩手貨當然揸到底，「嗰少少貨梗係擺喺度唔理，第時見到林順潮，都有得同佢講『喂，我有支持你㗎』咁呀嘛，哈哈……」咁設想周到又八面玲瓏，抵陸叔人緣咁廣啦！
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.finance.appledaily.com
