操盤手劄記：準到爆的測市指標
恭賀新禧，靈犬旺財！踏入狗年，港股喺美國掛牌嘅ADR率先報喜，按比例推算報31529，相對上周四收31115，高414點或1.3%。
雞年港股升咗33%，狗年點睇？睇番上個雞年2005年，港股升咗13%，狗年2006年，港股再升30%，「雞犬皆升」既有先例，今年值得憧憬。
不過，今年港股波動性勢將增加。雖然美股連升六日，喺回吐一成之後反彈近半，但唔等於人心已穩，後市仍未明朗，港股亦難心安。華爾街有句諺語：the market climbs on a wall of worry，意指股市擔憂越多，往往爬得越高，屬逆向概念。股市現時攀爬嘅擔憂之牆，係通脹同加息。
上周，美銀美林公佈月度基金經理調查，當中有項「最擠交易」（Most Crowded Trade），揭示基金經理最驚係乜，屬反向指標。前月之最係Long Bitcoin，比特幣旋即見頂急跌；上月之最係Short Volatility，波動率旋即大幅抽升，連續兩期貼中爆破主題，準到令人O嘴。
今期之最係乜？係Long FAANG+BAT（做好臉書、蘋果、亞馬遜、Netflix、谷歌，以及百度、阿里巴巴、騰訊），其次就係Short USD。值得注意嘅係，以往幾次Long FAANG榮登最擠交易之時，都發揮唔到反向指標嘅作用，因此，Short USD變成最有機會爆破。
美國下月加息幾成定局，加息利好美元，造淡美元變成「最爆」都唔出奇。另一方面，當美國利率上升，美債作為主要定息資產，國際金融股可望受惠於息差擴闊、定息資產收入提升。話時話，港股兩大藍籌國際金融股，匯控（005）初五放榜，友邦（1299）就下周二。
友邦新業務價值（NBV）每年都有雙位數字增長，2017年首三季增34%，大行睇好全年增幅，高盛預計增29%，德銀睇28%，大和、中金睇27%。經營溢利上升，有助推升內涵價值（EV），德銀就預計友邦EV升18.5%。友邦舊年11月以嚟窄幅整固，現價63.3元，業績若有驚喜，可望挑戰70元。
割柑人
本欄逢周二刊出
割柑人
操盤手札記 - 割柑人 舊文
來源 source: http://hk.finance.appledaily.com
