中環在線：新年開市 林鄭驚喜現身
■舊年交易大堂結束當日，林鄭同過百位「紅衫仔」大合照。資料圖片
今日係港股狗年首個交易日，港交所主席周松崗同行政總裁李小加齊齊主持農曆新年開市儀式就當然啦，但今年港交所有驚喜畀大家，就係罕有地請到特首林鄭月娥出席兼致辭。
翻查資料，特首出席農曆新年
開市儀式幾乎絕無僅有，政府近兩年都係派出財經事務及庫務局局長做代表出席。今年咁大陣仗，莫非證明小加總裁續約有望，定係為咗畀面林鄭嘅中學師姐、有機會做港交所主席嘅查史美倫？
見證金融大會堂開幕
據了解兩者皆不是，正確答案主要係因為今日同時係由交易大堂改建而成嘅香港金融大會堂（Hong Kong Connect Hall）開幕，所以為咗隆重其事，就請特首出席。查實舊年交易大堂結束當日，林鄭都有出席，仲同過百位新舊出市代表「紅衫仔」大合照！
過去港股一啲重要時刻，時任特首都會出現，例如曾蔭權2008年出席農行掛牌儀式；梁振英2014及2016分別為滬港通同深港通敲鑼。另外，據聞財政司司長陳茂波、財經事務及庫務局局長劉怡翔今日都會現身，至於查太呢？就暫時唔清楚。
由於冇咗交易大堂，由主席同行政總裁變身做財神爺，向「紅衫仔」大派利是嘅重要環節亦成過去。不過李小加仍有一大任務，就係同大家介紹香港金融大會堂。呢個Connect Hall有幾connect，港交所話要保持神秘感，華華惟有今日早啲起身睇睇啦！
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.finance.appledaily.com
