金手指：反彈全因聯儲局
■當股市大跌，只要聯儲局出手，就會彈到暈。 資料圖片
狗年第一個交易日，孫柏文祝大家上落平安、年年有餘。上周，我分享咗07年炒股，特別買跌時，喺當年「大奇蹟日」所學到最大嘅教訓，就係股市第一嘢掟落來，如聯儲局出手，就會彈到暈。
對上四個交易日，恒指由今年低位到
年三十晚收市，反彈咗兩千點。答案就係聯儲局出手。過去周末，我等聯儲局每周一次公佈嘅最新數據。一出，就真係確認我嘅睇法。
喺三周前，聯儲局拋售手上嘅債券，將得來嘅現金燒咗。金額大約200億美元，股市即刻大插插。之後個禮拜，唔知每日有咩操作，不過全周總體係停咗，冇再賣。如果睇股市波幅去估，應該嗰周先繼續賣嘢，不過見股市跌勢，嚇到佢哋買番嘢，將錢注番入系統裏面。
到上周，美股連升五日。如果我問你，你覺得聯儲局上周係賣嘢攞錢走，定係買嘢，你會點答？佢哋上周係買嘢，買咗約值140億美元值嘅嘢。有冇關係？唔知，不過數據同理論就係咁，信唔信由你。
「咁睇實呢個數據就得啦！」你可能話。對不起，冇用。因呢個數據係滯後指標，到有數據，個市已經鬱咗。
咁點算？我都唔知。聯儲局本身話到明到今年第三季，每月要攞走500億美元。你𠵱家攞走200億，個市都已要你攞番140億出來，所以佢哋係咪會跟時間表？
佢哋唔跟時間表，個市咪好似舊年咁係咁慢升，佢哋跟嚇、停嚇、再買番啲嗰嚇，咪好似上兩周咁chok到你暈囉。大家出入平安，事事順利！
孫柏文
獨立股評人
http://fb.com/shuen
本欄逢周二刊出
孫柏文
金手指 - 孫柏文 舊文
來源 source: http://hk.finance.appledaily.com
