魚樂無窮：今季靠一招致勝
■港股第二季應該點玩？橫睇豎睇都係要靠北水。 資料圖片
恒指首季雖微升近1%，但當中經歷超過3,000點的升幅及跌幅，埋單要錄得正數絕對唔係易事。
以自己倉位為例，1月順風順水，氣勢如虹，滿以為可複製舊年的贏錢方程式，豈料2月爆出小股災，賬面利潤瞬間全數蒸發，
更一度見紅，之後唯有沉著應戰，再用注碼控制風險，才勉強收復一半失地；現在回想，算是執番身彩。
踏入第二季，相信難玩指數有升冇跌，這邊廂中美貿易戰消息不斷已經夠煩，那邊廂特朗普無定向出招，最新又向科網股埋手，令股市波動性大大提高，一旦企錯邊，要追數便要加倍努力。
有跟開本欄facebook的戰友，唐牛每朝都會提供通告雞精，心水清的想必會留意，今年盈喜股數目明顯減少，盈警股則有所上升，與其說公司業績走樣，倒不如話係基數效應，意味借用企業盈利推高指數呢招今年已不管用，恒指又少了一份動力。
咁第二季應該點玩？橫睇豎睇都係要靠北水，匯控（005）在平保叫停掃貨後，股價由高位計足足唔見10蚊，出名難炒的金蝶（268），獲得北水眷顧，股價破頂再破頂，睇完呢兩個例子，你就明白北水的重要性！
唐牛
http://fb.com/tongcow88
本欄逢周二、四刊出
唐牛
魚樂無窮 - 唐牛 舊文
來源 source: http://hk.finance.appledaily.com
