金手指：鑽石價值面臨暴跌
■天然鑽石係要地殼長時間經巨大壓力同高溫產生，所以咁罕有。資料圖片
12年前，孫柏文啱啱開始寫本欄時，曾寫過一篇題為〈鑽石可以保值？哈、哈、哈！〉嘅文。當時我用珍珠歷史做比喻，話因科技進步，鑽石係唔會有保值能力。珍珠係碳酸鈣化合物，當年日本拉麵商人禦木本幸吉（
Mikimoto）發明人造養珠後，珍珠價格每況愈下，天然珠、人造珠總體價格都大跌，成為人人唔使點諗都買得起嘅普通飾物。
鑽石根本上係碳，只係因同其他碳化物唔同，化學組織上光折射率極高，所以先咁閃。鑽石係要地殼長時間經巨大壓力同高溫產生，所以罕有。雖人類50年前已發明人造鑽，因科技問題製造成本極高；不過近年造鑽成本不斷下滑，質素不斷提升，工業用鑽基本上已完全唔用天然鑽。
數周前唔少傳媒報道鑽石業龍頭De Beers180度飄移，今天的我摧毀昨日的我，話會開始賣人造鑽，話原本賣幾萬蚊嘅一卡鑽，幾千就有交易。經過數周明查暗訪，我發覺問題嚴重。大家都中咗鑽石毒，知「鑽石恒久遠」，即世上掘過出來嘅鑽石冇消失過。由鑽石企業自己多年扣起，人為縮供應嘅鑽石，到各位保險箱裏嘅珍藏，一旦見人造鑽巨浪殺到，人踩人咁放時，鑽價可以點？不過今日送鑽石溝女會仲令港女有feel。點解？明知價格會好快跌到一仆一碌，都肯為博紅顏片刻一笑去買。呢一笑，對送鑽嘅人，你話幾值錢！
孫柏文
獨立股評人
http://fb.com/shuen
本欄逢周二刊出
孫柏文
金手指 - 孫柏文 舊文
來源 source: http://hk.finance.appledaily.com
