股場解密 - 歐陽風 2018年11月23日
【股場解密】歐陽風：美團季蝕800億 有妖股味道
2018-11-23 8:54:06
今年9月才掛牌，市值達到3352億元的巨無霸獨角獸，美團點評（03690.HK）首份季度業績認真嚇親人，截至9月底止3個月勁蝕832億元人民幣，折合近千億港元，記憶所及應該創下本港股票史上蝕錢最勁紀錄。
之所以蝕咁多，主要是由於其中可轉換可贖回優先股之公允價值變動帶來797.5億元會計虧損，好明顯是管理層或主要股東在上市前用低價CB換股份先賺一筆勁至去上市。
唔計呢條數，集團經營虧損3個月亦已經達到34.5億元，如果每季都蝕咁大條數，一年豈不是也要蝕百幾億元？呢盤生意究竟如何估值同定位的呢？
集團季內收入191億元，其中58%來自餐飲外賣，23%來自到店、酒店及旅遊，18%來自新業務。雖然收入增加一倍，但由於同期銷售成本增加得更多達到132%，因此上季集團經營虧損是隨生意額做大咗而進一步增加。
所謂餐飲外賣，即是幫餐廳做統一外賣，從中分得些微外賣費。分部業績顯示集團餐飲外賣毛利率16.6%，其實係好低增值能力的生意，即使做到過百億元生意額，毛利率都好難再提升。新業務毛損達到12.9億元，毛損率37%，這些業務包括共享單車、CALL的App等，事實證明生意模式行唔通。
呢隻有大摩及高盛等大行做保薦的同股不同權股票，老實講估值點解可以去到69元一股上市，即逾3700億元市值，完全是靠大行吹出來的故仔，加上港交所（388）來者不拒，引入了這些具高水份的公司來上市，間接造就了這些離譜股，更甚者可以稱得上是妖股。中國股市都唔敢引入的這類獨角獸股，引入香港盞又多一批股民中伏。
股場解密 - 歐陽風 舊文
來源 source: http://www.winmoney.hk
