【異動尋寶】波動市逐利 三招幫到你（魏力）
中美談判有進展，要多傾一日，港股即時挾高500點，又再清一大批熊仔，週一魏力在網台訪問提供的26400目標已到，下兩個阻力為26700及27200點，揸好倉的戰友，睇實呢兩個位分段獲利，千萬不要貪勝不知輸。
週三（9日）成交過千億，睇淡者當然
可以高呼「趁好消息，大成交派貨散水」，但觀乎個股（特別是板塊龍頭股）的表現，是否派貨散水？魏力頗有保留。目前市場人心仍非常虛怯，指數午後一縮就搶住食糊，操作審慎不言而喻，加上不少行業龍頭仍在低位掙紮，何來派到貨？
宏觀去睇，中美貨幣政策轉趨寬鬆，市場資金增加，但經歷去年的煎熬市況後，投資者信心仍非常脆弱，一推上少少就搶住食糊，加上基本因素仍在轉差，要單靠資金形成持續大反彈的機會不高。不過，波段操作仍然可行，例如博一至兩星期升市，今次恒指由低位24896點開始反彈，即使打個折去到26700就止步，也有約1,800點波幅，足夠時間做些短炒。
就如週一訪問所言，博彈可視乎風險承受能力，選擇不同的套路。最基本賭指數上，就買大藍籌，例如騰訊（700）、平保（2318），或者友邦（1299）、內銀股。
另一策略就是發掘淡倉眾多的股份，買入博挾倉，例如個別手機股、汽車股、醫藥股等等，但只宜小注，因為很可能博錯隔離，失敗的機會並不低。
第三招就是跟消息炒即日，例如昨日消息指，中央將推出措施谷家電、汽車消費，就可以搵相關股炒作，但當然要跟得貼新聞先做到，以及要反應快、一開市就衝入去，唔係好易變成對家的「提款機」。
近日不少戰友inbox話唔敢買貨，只想候高put，這是人之常情，因為個市真係跌左好耐，已形成一種「必然繼續跌」的共識。不過，今個星期一主流評論都係話「彈散市」時，個市卻逆流而上，跟主流意見去做是否明智？就交由看官決定。
本人為證監會持牌人，持有騰訊、平保財務權益。
www.facebook.com/2012jason
異動尋寶 - 魏力 舊文
來源 source: http://hk.finance.yahoo.com
