短期格局 反覆向好
2019年01月10日
中美貿易談判結束，美國貿易和海外農業事務副部長Ted McKinney昨午表示，「認為談判進展還算不錯」。中港股市齊齊造好，但港股升幅顯著，成交突破千億關口，市場氣氛有好轉跡象。
內地加大力度谷經濟
內地上星期宣佈降準
，但市場似乎仲係關注中美貿易談判多一點。中美談判代表首度直接接觸，談判完結後雙方似乎都想放出利好氣氛。美國傳出話有兩派意見，鴿派好想達成協議，鷹派話唔可以因為內地增加採購就滿足，要求內地改變經濟模式。現在出來讚好係主要涉及農業的談判代表，雖然係咁，中美首度接觸無惡言相向，加上估計特朗普想有協議，所以市場已經收貨。由於短期無會開，如無意外貿易關係處於好短暫的穩定期，直至中國副總理劉鶴月底可能再去美國進行下一次談判。
中港股市昨日齊齊造好，但A股尾段升幅收窄，上證指數收報2544點，升17點；深成指數收報7447點，升56點。港股中段曾升逾700點，收市恒指重上26000點，收報26462點，升586點；國企指數收報10358點，升224點，成交1127億元。一般情況下，兩國會談通常喺結束後一兩日先有料漏出來，特別係美方好興私底下爆出內情，增加談判籌碼，未來一、兩日可能會有多啲細節流出，個市會受消息左右。
周二兩隻急跌股份各走極端。國家發改委副主任寧吉喆表示，今年將推出促進汽車、家電等熱點產品消費措施，促進汽車、家電等消費，當中特別鼓勵農民買車，吉利汽車(175) 因為有政策支持消息，急彈8.4%，收報11.08元；其他汽車股以長汽(2333) 炒高9.3%最為突出，收報4.71元；廣汽(2238) 亦收揚7%，報7.86元。同人唔同命，急跌後無反彈的小米集團(1810) 高層雖然承諾不減持，仍逆市急跌6.9%，收報10.34元。
港股喺2019年首個交易日大插，情景有點嚇人，跟住中美政府都出招。導致跌市兩大因素加息同貿易戰，大家都做咗功夫去穩定情況。按目前狀況，美國聯邦儲備局短期唔似會放鷹，中美談判暫時又保持平和氣氛。同時，外電引述知情人士透露，2018年12月底召開的全國財政工作會議指出，中國計劃將2019年預算赤字率目標設在2.8%左右。雖然最終赤字比率仍待全國人民代表大會審議通過，但估計年頭內地會有不少維穩政策出台。
港股由低位反彈一段，升得多可能會回落一下，但因為大市仲處於短期低位，應該仲有支持，不排除消化完仲會再彈上，回試番高小小水平。喺呢個處境下，低位入貨者不必急於食胡，要食胡最好分段。若然低位無撈貨，高追怕遇個市回頭，可以等回頭時揀啲仍然落後的股份。
平保受制A股較落後
講到仲係低位的股份，陸羽仁同投資銀行家傾起隻平保(2318) ，點解最近咁弱勢？銀行家話唔覺得平保有特別問題，雖然外界有說法係因為平保高層有人事改組，令人關注馬明哲去向，但佢認為關係不大。照佢的說法，平保近月弱勢，只是跟A股跌，因為在內地跌市初期，平保表現頗為硬淨，跌幅一直小於大市。直至最近平保呈現弱勢，開始追回內地先前跌幅，兩者差距才拉近。
銀行家話，平保下跌一來同與內地經濟前景有關，若然內地經濟差，公司必然受影響；二來係之前未跟大市跌夠。若論公司質素和生意表現，見不到平保有特別問題。好似呢類大型企業，本身發展相當穩定，照計唔會輕易受人事影響。
睇番A股指數一年內跌幅接近30%，平保A股由78元人民幣跌落昨日56.95元水平，跌幅相若。
由於A股下跌牽引，平保在港掛牌的H股近月跌幅轉急。平保現時市盈率11.35倍，息率有3厘，以公司一貫估值計，現在處於偏低水平。當然，現時成個A股都係好低，並非只係平保低。但如果覺得內地股市處於好有支持水平，加上股份未曾明顯回彈，現價68.1元的平保仍算係落後之選。
陸羽仁
金融High Tea 舊文
來源 source: http://hdfin.stheadline.com
