智取大市 - 晉佳 2019年1月14日
智取大市：人幣升值信住先 - 晉佳
人行多管齊下放水，喺貨幣供應增加下，人幣冇受壓仲要升，係好兆頭。 資料圖片 適中字型 較大字型
最近幾日，唔少散戶朋友活躍起嚟，有人問𠵱家係咪入市時機，亦有人唔係問入市好唔好，而係通知小弟「係時候入市啦」，不禁抹一把冷汗。
美元轉弱、人幣轉強，人幣仲要呈圓底狀態，牌面轉勢又的確相當明顯。人行多管齊下放水，喺貨幣供應增加下，人幣冇受壓仲要升，係好兆頭，情況有別於年尾一有降準等放水消息、人幣就轉弱嘅形態，資金亦會流入股市。周五晚傳出人行唔想人幣升值過快，CNH即刻由6.73急回到6.76，呢類消息理應唔會阻到滙價趨勢，人行亦無理由希望人幣Chok返落去7算附近咁牙煙，理論上嚟緊keep到強勢。
人幣由貶值變升值預期，中資股理應唔理好醜從低位全面、或前後腳反彈，睇嚟仲未完全反彈曬。周五受惠人幣升值及低油價嘅航空股急彈，牌面仲有得去，其餘只要係正路中資股，業務比重較多喺內地，正正路路股價仲未由低位反彈，都有條件追一轉落後，後市要睇住升市成交額能否保持。
最怕嘅係，利好因素有人講，利淡因素冇人理，就差不多升市盡頭。不過，股市係資金話事嘅地方，資金面變得咁明顯，都係要信住先，最多且戰且走吧。
晉佳
http://fb.com/advanceguy1
本欄逢周一、三、五刊出
智取大市 - 晉佳 舊文
來源 source: http://hk.finance.appledaily.com
