【大茶飯】信誠哥定信聰明錢？（青冰）
誠哥早幾日話，今年經濟差一啲，樓市波動厲害啲，幾乎每個國家都面對低增長，更提醒大家唔好炒樓。誠哥每次講嘢都語重心長，記憶中呢幾年都係話平穩，好少會講明差一啲，所以大家今年打穩守啲，絕不為過。
青冰唔太記得誠哥開口測市的準繩度，但長和系做動作就好準嘅，2015
年完成世紀重組，當年就是A股爆煲之時，跟住就開始收水期，去年完成出售中環中心，袋返400億，之後一年的物業市場走向，相信大家都好清楚。
現在睇恆指，對香港經濟的代表性，已經甚低，真正的香港股，領展(0823)及幾隻本地地產股最正宗，金融的代表就係中銀(2388)及恆生(0011)，加埋隻港鐵(0066)應該就齊曬，至於最穩陣的公用股兩電一煤，來自香港的收入都是約三成，難怪近年咁穩陣啦。而旅遊及本地消費，最應該睇莎莎(0178)及周大福(1929)，一睇個圖已經唔開胃，均在上周創了新低，莎莎在上周公佈第三季，即9至12月的零售數字，都認真曳嚇，相信農曆年將要進行促銷活動喇。
中銀及恆生今年表現一般吧，先創新低後反彈，但去年第四季至今，都累跌兩成；而本地薑地產股，今年表現標青，近月低位要數返去10月時，平均累升一成半以上，現時回想梗係理所當然啦，聯儲局放鴿，加息會減慢甚至停止，先不論本港會唔會追返未跟加的息，但起碼美國那邊見頂，對地產股已經係一個強勁支持。你再回帶睇返十月的新聞，加息減慢應該冇今天咁明朗，當日股市仲好差添，但點解本地薑地產股十月已經見底呢？這就是青冰經常強調的尊重市場，那些聰明錢總會比我們靈敏，當大家半信半疑時已經抄底，我們當刻想不到原因，只是道行未夠罷了。
出了壞消息，是再創新低還是拒絕再落，係非常有啟示，你睇上星期的莎莎及舜宇(2382)就知，前者曳數再尋底，後者曳數加行業大吹淡風，但呢幾日仲同一眾手機設備股齊齊彈，究竟係聰明錢行先，還是死貓彈，睇多一個月應該會清楚，撈底未必係時候，但造淡似乎要停嚇手喇。
Fb個人專頁http://www.fb.com/chingbing888
大茶飯 - 青冰 舊文
來源 source: http://hk.finance.yahoo.com
