笑到最後 - 高明 2019年1月14日
笑到最後：減辣只牽涉一個問題 - 高明
特首林鄭月娥指，政府沒有計劃放寬按揭。 資料圖片 適中字型 較大字型
早前財政司司長陳茂波撰文指可能會研究放寬按揭。特首林鄭月娥則指沒有計劃會放寬按揭，政府要極度審慎地考慮。
應否作出任何型式嘅減辣，背後牽涉嘅問題只有一個：就係想樓價升定跌。想樓價跌，便應減辣；想樓價升，便應維持甚至加辣。
過去政府成日話辣招係「需求管理」，但印花稅及收緊按揭實踐上都係「供應管理」。政府原以為加稅會令買家卻步，如果實施一刻，香港係冇一個人擁有物業嘅無產階級天堂，的確可能會減少需求。不過，香港自開埠176年，無數家族經歷幾代人，已喺樓市累積大量樓盤，最極端例子，係差餉物業估價署公佈，有人一共持有15,645個物業，當然可能係發展商居多，但唔極端嘅例子，一人持有超過一個物業亦大有人在。
上述辣招令再買成本上升，只會令已持貨者唔沽貨，令樓市出現長達十年大牛市。過去二手樓先係最主要嘅供應，亦令今次調整浪，除個別劈價外，大致仍未跌足2018年升幅，同期港股則已穿曬底，辣招應記一功。
至於乜嘢係「需求管理」？娥六招入面嘅居屋及資助房屋就係需求管理，因為又52折42折，買家要幸運大抽獎先有機會中，如果之前曾置業就冇份抽，變相每次公佈大抽獎，都會令潛在買家寧願等抽獎派彩後先決定，做到期望管理，自然管理到需求。政府每隔幾個月推出一次，自然會有一班人留起資金等中獎，道理同金多寶攪珠前人人都諗中咗一億點使一樣，抑制買樓需求，心理大於實際供應量。
樓市經歷超長牛市，大把人可以食糊，因為辣招先唔鬱，一旦日後賣出後買返成本下降，更多人可以考慮食糊。二手供應增加，成交量少，減辣只會令樓價下跌。想保住樓價，梗係唔減辣啦。
高明
http://fb.com/bigricetea
本欄逢周一刊出
笑到最後 - 高明 舊文
來源 source: http://hk.finance.appledaily.com
