笑到最後 - 高明 2019年1月7日
笑到最後：純睇數據非太恐怖 - 高明
港股由去年高位跌幅計，明顯係股災，但因為用嘅時間太長，所以唔係好覺。
資料圖片 適中字型 較大字型
2019年首日開市，港股大跌715點。港股由高位跌幅計明顯係股災，但因為用嘅時間太長，所以唔係好覺。比起當年，今日資訊更爆炸，唔想俾新聞擾亂，純粹睇數據，2018年拉布式下跌，至今已經11個月，倒數過去港股高位下跌後要幾多個月先完成跌浪，睇一睇數字又唔係咁恐怖。
最多人拎嚟同2018年比較嘅係1997年，點解？因為股樓齊升，其中樓市升得更勁，同埋升浪已維持好多年，配合一個加息周期，兩者真係有幾分似。97年高位8月計，一共跌13個月，合共下跌61.09%。之後反覆上升19個月，恒指反彈1.66倍。
至於2008年金融海嘯，雖然冇人話同𠵱家似，但亦係一個高位下跌，值得參考。07年10月高位計，08年10月先見底，但磨至09年2月跌完反彈，歷時16個月，最多下跌66.59%。
最輕微影響一次反而係2015年，A股股災，港股由4月見頂後，反覆下跌10個月，2016年2月見底，高低跌幅36.06%。
一個跌浪，只得兩個考慮因素：時間同埋幅度。今次港股從高位已反覆下跌11個月，如果1月都跌就12個月，已經好接近萬眾期待嘅97翻版跌足13個月，如果真係97翻版，即係捱多個零月就反彈。即使係08翻版，都係爭5個月，要捱嘅時間唔會太長。不過，以幅度計，今次跌浪高位計只跌26.71%，相對過去股災跌逾六成輕微。唔怕佢急跌，最怕係慢熊，如果最後幾個月先急跌，反而係明顯見底先兆。
但今年亦有唔同嘅地方，第一個交易日就台海局勢緊張，加埋早已種下嘅中美貿易戰、科技戰、華為等等，投資嗰本書暫時放低，今年要了解股市，要拎起本歷史書學政治。
高明
http://fb.com/bigricetea
本欄逢周一刊出
笑到最後 - 高明 舊文
來源 source: http://hk.finance.appledaily.com
