收市閒情 - 千頌C 2019年3月6日
收市閒情：兩會萬七字的重點 - 千頌C
近年政府工作報告提及「習近平」呢三個字次數，由早幾年嘅5次、6次、8次到呢兩年嘅13次，「習核心」必然是重點。
資料圖片 適中字型 較大字型
國務院總理李克強，周二宣讀政府工作報告。洋洋灑灑近17,000字，重點有啲咩，就真係一百人一百種解讀。不過無論如何，以下幾點，係真係行過路過唔好錯過：
首先，成份報告個重點，當然係「在中國共產黨領導下，中國人民有戰勝任何艱難險阻的勇氣、智慧和力量，中國的發展沒有過不去的坎。」起來！起來！起來！我們萬眾一心，然後GDP就會……就會下調。
今年李克強預期GDP增長目標只有6%至6.5%！意思即係話，今年增長有機會衰過上年嘅6.6%，亦即係話好大可能係自1990年以來新低。
另外，以往GDP預測都係用一粒數就算，今次一開就開一個range，仲要係一個無論如何，都係差過上年既區間，即係話「今年已經會衰架啦，但點衰都冇可能衰過6！如果跌穿6呀？咁就GG啦！」所以今年中國應該會風風火火，全國齊心去保六！
第二，呢份報告另一個不得不提嘅重點，當然係「習近平」！今時今日，中共講嘅係「習核心」、「習大帝」，作為政府工作報告，講過去一年嘅成果，點可以唔提到「習大大」？
近年政府工作報告提及「習近平」呢三個字次數，好明顯穩步上揚，2014、15年有5次；2016年有6次；2017年有8次；去到上年大躍進，達13次之多。至於今年亦維持於13呢個水平。此前中共領導人喺政府工作報告中，被提及次數超過10次嘅只試過兩次，分別係1975年毛澤東嘅17次，及1997年鄧小平嘅11次。當然，好似一間公司咁，派開3仙息，今年突然縮皮，都會惹人猜測；何況係顧及習大大嘅威信！
目前中共已打破主席「連續任職不得超過兩屆」規定，永續習帝不是夢，即係話未來嘅政府工作報告，提及習近平嘅次數，只會有增無減，假以時日，報告應該會有4萬字，有一半都係「習近平習近平習近平習近平習近平習近平……」。
千頌C
http://fb.com/winbigwok
本欄逢周三刊出
收市閒情 - 千頌C 舊文
來源 source: http://hk.finance.appledaily.com
