金融High Tea - 陸羽仁 2019年3月6日
低殘板塊易炒政策
2019年03月06日
港美股市炒作貿易協議，但係隔晚美股有啲洩氣，杜指先升後跌，一度勁插超過400點，收市跌207點。港股表現比美股好，指數雖然開市回落，但到中午企穩，收市升2點，但主要因為股王騰訊(700) 單天保至尊，其他股份都要回氣，消化獲利回吐壓力。
減稅降費力求催谷
港股走勢比美國強，主要有兩個原因，其一係港股由高位回落，O依家距離高位仲有近4000點水位，相反杜指只係差1000點左右，阻力開始增加。再者係A股繼續反彈，有資金繼續炒作人大政協兩會政策，氣氛比美股好。
人大會議開幕，總理李克強發表政府工作報告，調低今年GDP增長目標到6至6.5%。中央同時推出一系列紓困措施，包括減稅降費，規模近兩萬億元人民幣，以減稅提赤支持經濟。喺消息帶動下，內地股市升幅擴大，全線造好。上證指數收報3054點，升26點；深成指數收報9595點，升211點。
陸羽仁同本地股市大戶研究港股形勢，大戶坦言內地經濟環境欠佳，中央放水力谷。放鬆銀根推動經濟最大難題，係資金唔容易到位，銀行對民營企業放貸仍然偏緊，有錢都借畀較為安全嘅國企，政府想藉銀行放貸去推動經濟，並唔係咁容易。
O依家內地失業率差唔多有5%，仲高過美國，令經濟有壓力。本地大戶話，內地經濟唔係太得，但外資就選擇喺呢個時候，發功夾高香港股市。當美股喺舊年尾急插到熊市區域，散戶加入追沽，外資大戶就喺今年初一口氣炒上港股，散戶愈唔信，個市就愈升，呢個就係外資睇住散戶嚟食，買大開細嘅典型格局。
如果借用大戶買大開細嘅理論，O依家中美雙方談判進入直路，若然真係到月尾可以達成協議，咁炒作概念喺呢個時候，就差唔多告一段落，大家炒股都要睇路。
大市噚日繼續喺29000點前波動，收報28961點，微升2點；國指則升7點，收報11582點。大市成交金額1187億元，全日沽空都有175億元，沽空比率12.5%。
優品累升1.5倍炒味濃
雖然大市三連升，但基本上只係因為騰訊力撐。受公司計劃增加對中國電競投資消息支持，騰訊獨撐大市，曾見362元，創舊年8月30日以來新高，大漲4.2%，報361.4元，單股貢獻恒指121點升幅。
股仔方面，半新股優品360(2360) 炒味濃郁，股價再創上市新高，並以全日高位收市，報2.55元，抽升11%。優品360喺1月11日以招股價1元掛牌，累升達1.5倍。
總理報告除咗減稅降費，利好宏觀大環境外，報告亦提出繼續多管道發展同提供有質量教育，教育股造好。澳洲成峰高教(1752) 收升14%，報0.405元；新高教(2001) 收升8%，報4.82元；中教控股(839) 收升8%，報12.72元；希望教育(1765) 收升7.5%，報1.29元；睿見教育(6068) 收升6%，報3.7元；楓葉教育(1317) 同民生教育(1569) 都升超過5%。教育股早前喺跌市中插完再插，O依家大幅炒上，可以視之為借消息炒反彈。呢個板塊股份資產唔多，市值相對細，底子唔係咁好，屬於三、四線股，進銳退速，個市消化時就炒炒反彈。
內媒報道，深圳多間銀行下調房貸利率，內房股借勢向好。雅居樂(3383) 收飆7.4%，報11.28元；合景泰富(1813) 收揚3.6%，報8.39元；碧桂園(2007) 收升3.5%，報11.26元。內房O依家融資仲係唔容易，但因為股價跌得多，大型內房始終有底子，特別係廣東多土地儲備者，可以炒作吓大灣區概念。三月上旬有兩會因素，唔同板塊會伺機搵藉口炒上，若然想走短線，就要留意未郁過嘅股份伺機買入，一擊得手就食胡為敬啦。
陸羽仁
金融High Tea 舊文
來源 source: http://hdfin.stheadline.com
