收市閒情 - 千頌C 2019年8月21日
【收市閒情】旅業寒冬 變陣良機 - 千頌C
香港進入旅業寒冬，或者旅發局係時候重新思考佈局，例如吸引高質旅客。 資料圖片 適中字型 較大字型
「有冇其他嘢需要？呢隻胭脂好多客買，幫你試上面。」港旅遊區化妝櫃位小姐，可算係零售旅遊業嘅寒暑表。佢哋對香港人服務態度越殷勤，就代表呢個行業市道越差。
多得中共為堵截「時代革命」精神輸入中國，自八月起已停內地團來港，港內地遊客近乎消失。你可能會話，「你班暴徒！知唔知有八成旅客係來自大陸？攬炒啦！」與其話係攬炒，不如話係逼港府重新正視旅遊業帶來的民生問題。
點樣處理over-touristed嘅問題，我哋可參考嚇外國勢力。荷蘭阿姆斯特丹，近一年推出唔少「打擊」旅遊業政策：包括部份地區禁Airbnb；計劃停遊輪泊岸；為疏導人潮，更將附近嘅贊德福特（Zandvoort），改名做Amsterdam Beach。其打遏旅遊業嘅決心，甚至大到將巨型地標「I amsterdam」拆走。你諗嚇，香港會唔會拆金紫荊？
玩咁大，到底佢一年有幾多旅客？阿姆斯特丹人口110萬，面積219平方公里，年吸1,800萬遊客！看我們香港：人口730萬，面積雖有1,106平方公里，但已發展土地僅276平方公里，而香港一年招呼6,515萬遊客！地方本來已經逼，仲要比阿姆斯特丹足足多2.6倍遊客。事實上，2018年，撇除內地客，來自其他地區嘅遊客，都已達1,411萬人，同阿姆斯特丹遊客唔差得多。此反映，香港旅遊業早已超出負荷。
想旅遊業可持續發展，從來都要廣納四方客。目前港旅遊業佔港GDP約4.5%，香港進入旅業寒冬，或者旅發局係時候重新思考佈局；再唔係可以參考嚇荷蘭份《Perspective 2030》報告，該國旅遊業政策講明，唔會再大力對外宣傳荷蘭旅遊，反而重點放喺目的地管理，更重要係，報告強調一件事，就係：希望吸引高質旅客「who will add value and will not cause trouble」。
千頌C
http://fb.com/winbigwok
本欄逢周三刊出
收市閒情 - 千頌C 舊文
來源 source: http://hk.finance.appledaily.com
