港股經過多星期的急衝，終於迎來深度調整，市場情緒由超樂觀轉悲觀，武漢肺炎是否可控，這個不明朗因素將於春節後困擾大市
，但港股去年經過貿易戰及反送中兩大嚴峻考驗都死唔去，青冰仍相信危中會有機。
唔知戰友有冇留意，近月有幾間H股申請實施全流通，並獲中證監受理，當中包括招金（1818），相信這是回應中證監11月時話全面推展H股全流通改革。H股全流通都講咗N年，如果落實的話，那些非流通的內資股將變成在境外流通，所以看淡者覺得這措施係幫助內地套現cap水，因為流通咗就沽得啦，代表死股變生股。
現時申請的只有寥寥幾間，受理咗都唔知幾時先批，暫時對股價刺激有限，但青冰即時想起，如果日後眾安在綫（6060）提出申請，定必對持有其內資股的百仕達（1168）帶來莫大益處。提起百仕達，很多戰友都覺得係衰股一隻，不宜沾手，睇番個圖，又真係得人驚嘅，2年前的高位係1.97元，現在0.43元，累跌78%。
2年前由8毫子炒到接近2蚊，全因百仕達手持眾安在綫8,100萬股內資股，當日眾安以59.7元上市，手上持貨即時變成幾十億資產。戰友可能會話，內資股係死股，邊值幾十億？講得非常啱，你估當日市場唔知咩？最後還是倍升了。
去年4月，百仕達都曾經由6毫炒到上9毫，並不是因為自己業務出色，而是眾安在綫獲發本港虛擬銀行牌照，最近仲成為首間試業的虛銀添，由此可見，每當眾安在綫有大動作，百仕達定必有反應。
現時講申請的確係太早，但別忘了眾安在綫曾是國內劵商認為全流通試點的大熱門，日後遞表都理所當然吖，再睇嚇百仕達股價貼近6年低位，非常殘，值博率高，鼠年應密切留意其動態啊。
青冰
http://fb.com/chingbing888
本欄逢周四刊出
冰說聰明 - 青冰 舊文
來源 source: http://hk.entertainment.appledaily.com
