香港人一向鍾情投資磚頭，無論香港住宅工商舖、定係大灣區海外樓都有捧場客。而近年愈來愈多人無論有樓好無樓好都想買返層海外樓，貪其一百幾十萬已經有交易。有很多讀者丶學生問我海外樓其實買唔買得過？我說那就要看你買嚟做乜——是自用還是投資呢？
如果你買層海外樓諗住用嚟移民或是未來退休自住
的話，筆者舉腳贊成，因為在香港100萬真係連車位都買唔到個。但如果你買海外樓嘅目的係諗住「投資」的話，那就要先停一停、Check一Check睇吓你起香港係咪已經有層自住物業，如果未有就衝去買的話，筆者絕不贊成！
筆者接觸過很多海外樓買家，佢哋大多手頭揸住一百幾十萬，覺得香港樓好貴一世都買唔起，因此就想買返層海外樓填補一吓「心靈嘅空虛」，同人講起碼都叫做有嚿磚頭揸手，其實佢哋嘅諗法起投資角度上係大錯特錯。
買海外樓同買香港樓一樣，都可以選擇承做按揭，但我發覺好多人買海外樓都唔做按揭，因為覺得煩借個幾十萬搞餐懵，而且當地按揭利息比香港貴一截，如馬來西亞約4至5厘、泰國約6至8厘、柬埔寨約10厘、而大灣區都要5至6厘，所以好多人都會選擇Full Paid，一來以後唔使供，二來又唔驚負資產，咁樣諗法更加錯上加錯。
投資物業最可貴之處在於「槓桿」！如果你揸住100萬元，你可能會Full Paid買層海外樓費事煩又唔使捱貴息，但同樣的100萬元你可以選擇在香港以高成數按揭購買一層500萬至700萬元的住宅（當然你要有足夠的供款能力啦）。
槓桿成回報差異
一層價值100萬元的海外樓同一層500萬元的本地樓，如果幾年後大家都升咗兩成，海外樓嘅樓價係120萬元，而層香港樓就已經升到600萬元。以100萬元的投資本金計算，買海外樓的回報是20%，但買本地樓的回報係一倍，足足係買海外樓回報嘅5倍，這就是槓桿的威力！
因此如果你有一百幾十萬資金而份工又OK的話，筆者建議你應先在港置業，一來唔使浪費「人頭」，二來亦可享受政府為首次置業者提供高成數按揭貸款的政策。
當然如果你在香港已經有層樓，投資海外樓亦不失為一個資金出路的好方法。總之，投資涉及風險，買海外樓始終是隔山買牛，最好能在當地實地考察了解清楚，咁買起上嚟就安心又放心啦！
2020年1月23日 舊文
來源 source: http://imoney.hket.com
